Ich Peter Newsidler von Laa licenciat in geistleichen Rechten und Capplan der ewigen mess die Eberhart der Castner in sand Peters Cappellen gestifft hat Bekenn fur mich und all mein Nach-komen und tun kund offenlich mit dem brief, daz Ich Recht und redleich abzeloesen gegeben hab dem edeln vesten Ritter hern Ulreichen dem Wuerffel und seinen erben achzehen pfund und sechs schilling pfenning geltes purkrechts, die dy vorgenante mess auf Iren drein tailn hauses gelegen gegen hern Otten und Haymen Cappellen uber gehabt hat nach laut ains purkrechts briefs der verlegt und verloren worden ist, umb anderthalb hundert pfund wienner pfenning, der Ich gantz verricht und gewert pin, und der egenanten mess anderswo wider ze nutz angelegt sind worden. Also das der egenant Wuerffel und sein erben sullen nu furbaser des vorgemelten purkrechts gantz ledig und frey und uns des von dem egenanten Irem haus nicht mer gepunnden sein ze dienn in dhainer weis und sullen auch Ich und mein Nachkomen furbaser auf das egenant haus umb des vorgenant purkrecht weder mit briefen und urkund noch an brief und urkund noch mit dhainen andern sachen dhainerlay zuspruch noch vordrung nicht mer haben weder mit Recht noch an Recht in dhainen wegen. Wêr aber das furbaser icht brief oder urkund furbracht wurden von wem das wêr die auf das egenant haus von des benanten purkrechts wegen sagen, dieselben brief und urkund sullen dann alsverrer Sy dasselb purkrecht berurnt allerding tod und zenichte sein und dhain kraft mer haben in dhainer weis ungeverlich Mit urkund des briefs besigilt mit der erbern Wilhalm des Merttinger und Linharts des Hausleitter baid burger ze Wienn Anhangunden Insigiln die Ich zu gezeugnuss der sach mit vleiss darumb gepeten hab In und iren erben an schaden. Darunder Ich mich mit meinen trewn verpindt stet zu haben sover geschriben stet. Geben ze Wienn an Mitichen nach sand Andres tag Nach Cristi gepurd viertzehenhundert jar darnach in dem drewunddreissigistem jare.

Source Fulltext: Peter Peusquens