Nos Mathias dei et apostolice Sedis gratia Episcopus victricensis Reverendissimi in christo patris et domini, domini Leonardi eadem gratia Episcopi pataviensis in pontificalibus cooperator. Universis christifidelibus presentes litteras inspecturis Salutem in domino sempiternam. Splendor paterne glorie, qui sua mundum illuminat claritate pia vota fidelium de clementia maiestatis ipsius sperantium etiam benigno favore prosequitur cum devota ipsorum humilitas sanctorum meritis atque precibus adiuvatur. Cupientes igitur, ut Altare Sancte Anne in Cappella beate Marie virginis et latere sinistro in littore wyennensi pataviensis diocesis situm, insignita congruis frequentetur honoribus et christifidelibus devotius veneretur, omnibus vere penitentibus confessis et contritis, qui predictum Altare, in diebus dictarum sanctarum beate Marie virginis et sancte Anne. Necnon Nativitatis Resurrectionis Ascensionis et Penthecostes Assumptionis Nativitatis Annunciationis et Purificationis ac omnium sanctorum atque dedicationis que dominica qua in ecclesia dei canitur Reminiscere celebrari debet devotionis causa reverentur visitarunt annuatim, de omnipotentis dei misericordia et beatorum Petri et Pauli eius auctoritate confisi XL (quadraginta) dies criminalium et octuaginta venialium de iniunctis sibi penitentiis misericorditer in domino relaxamus. In quorum evidentiam presentes litteras Sigilli nostri appensione fecimus roborari. Datum et actum in Cappella supra dicta Anno domini Millesimo quadrigentesimo trigesimo quarto.

Source Fulltext: Peter Peusquens