Ich Jacob Straiffing und Ich Peter Obrecht dye zingyesser baid burger ze Wyenn und die zeit baid ausrichter und volfuerer des geschêffts So weilent Hanns Ekprecht sêliger an seinen letzten zeiten getan hat und das uns darnach von dem Rat der obgenanten Stat ze Wyenn auszerichten auch em-pholhen ist, Bekennen fur uns und all unser nachkoemen geschêfftlêwt des egenanten geschêffts und tuen kund offenleich mit dem brief allen den er fuerkumbt, das wir mit guetem willen und wolbedachtem muet zu der zeit da wir es wol getuen mochten, und mit gruntherren hannden des Erwirdigen geistlichen herren hern Johannsen, Abbt des Gotshaws unser frawn Gotshaws datz den Schotten ze Wyenn verkauft haben ainen Garten mit seiner zuegehoerung, gelegen ze Alttainaw vor Stubentor ze Wyenn zenêchst weilent herrn Erharts des Schirlein haws, davon man jêrleich dient dem obgenanten gotshaws datz den Schotten daselbs ze Wyenn dreyssigk wyenner phenning an sand Michels tag, ze rechtem Gruntdienst und nicht mer. Denselben garten und was dartzue gehoert haben wir Recht und Redleich verkaufft und geben mit allen den nutzen und Rechten als der von alter in Grunt Rechts gewer herkoemen ist umb ainsunddreyssigk phund wyenner phen-ning, der wir gantz und gar verricht und gewert sein dem Erbern Merten Schêper dem Apoteker burger ze Wyenn dietzeit Zechmaister der Schreyber Zech auf dem Newn Koerner datz sand Stephan ze Wyenn und der gantzen gemain derselbigen Zech, furbaser ledicleich und freyleich ze haben und allen Iren fruemen damit ze schaffen als mit andern guelten und guetern So derselben Zech gehoerent vor aller Irrung und hindernuess ungevêrleich und zu pesser sicherhait So setz wir uns mitsambt unsern Nachkoemen geschefftlewt des egenanten geschêffts In ueber den obge-nanten garten und sein tzuegehoerung zu Rechten geweren und schermen fuer alle ansprach als grunt Rechts und der Stat ze Wyenn Recht ist. Wêr aber das In icht krieg oder ansprach daran auferstuenden von wem das wêr mit Recht, oder ob In mit Recht daran icht abgieng, das sullen Sy haben datz uns unsern nachkoemen geschêfft lewt desselbigen geschêffts und auf allem dem guet das zu dem obgenanten geschêfft gehoeret in dem lannd ze Oesterreich wir sein lebentig oder tod, Mit urkund des briefs besigelt mit des obgenanten Gotshaws datz den Schotten zu Wyenn anhangundem GruntInsigel. Der sach ist getzeug durch unserr fleissiger bet willen der Erber Ulreich Warenhofer burger ze Wyenn mit seinem anhangundem Insigel Im und seinen Erben an schaden. Geben ze Wyenn an Suntag vor unser frawntag zu der liechtmess Nach Kristi gepuerd viertzehenhundert und in dem vierunddreyssigistem jare.

Source Fulltext: Peter Peusquens