Ich Larentz Hagenawer gesessen ze Goetesprunn und Ich Dorothe sein hausfrau. Veriehen fur uns und all unser erben und tun kund offenleich mit dem brief, das wir unverschaidenleich schuldig worden sein und gelten sullen Barbaren und Margreten Hannsen von Bruenn seligen und mein egenanten Dorothen kinder die noch nicht vogtper sind und iren erben funf pfund wienner pfenning der swartzen muenss die herkomen sind von dem haus gelegen auf der Alserstrass vor Schottentor ze wienn zenagst Jorgen Steyrer des kochs haus das darumb verkaufft ist worden, der wir Sy oder wer uns an irer stat mit dem brief mont unverzogenleich ausrichten und bezaln sullen und wellen wann dieselben kinder vogper werdent und zu iren beschaiden jaren koment. Tun wir des nicht was Sy dann der vorgenanten summ pfenning furbaser schaden nement wie der schad genant ist oder wirdet den ainer mit slechten worten gesprechen mag der den brief furbringt denselben schaden mitsambt dem vorgenanten haubtgut geloben wir In mit unsern trewn an furpot und an klag gantz auszerichten und widerzekern an allen Iren schaden Sy sullen auch haubtgut und schaden haben datz uns und unsern erben unverschaidenleich und auf allem unserm gut das wir haben in dem lannde ze Osterreich oder wo wir es haben Es sey Erb oder varundgut wie das genant ist nichts ausgenomen wir sein lebentig oder tod Mit urkund des briefs besigilt mit der erbern weisen Hannsen des Haringseer und Ulreichs des Warnhover baid burger ze wienn anhangunden Insigiln die wir zugezeugnuss der sach mit vleiss darumb gepeten haben In und Iren erben an schaden darunder wir uns mit unsern trewn verpinnden stetzuhaben sovor geschriben stet Geben ze wienn an Montag vor unser lieben fraun tag als Sy geporn ist nach kristi gepurd vierzehenhundert jar darnach in dem vierunddreissigistem jare.

Source Fulltext: Peter Peusquens