Ich Hanns zingiesser der Abentewrer von Nuernberg mitburger ze Wienn und Ich Barbara sein hausfraw veriehen fuer uns und all unser erben und tun kund offenleich mit dem brief, das wir unvêrschaidenleich schuldig worden sein und gelten suellen dem erbern Niclasen Kramhofer burgêr ze Wienn und seinen erben Sechsundsechtzig phund wienner pfenning, der wir sy oder wer uns an Irêr stat mit dem brief mont unvertzogenleich ausrichten und bezalen suellen und wellen zwayundzwaintzig phund pfenning auf sand Joergen tag schirist kuenftig und zwayundzwaintzig phund pfenning auf sand Michels tag darnach nagstkuenftig, und zwayundzwaintzig phund pfenning von sand Joergen tag schiristen kuenftig ueber ain jar, an widerred und an alles vertziehen. Und durch pesserr sicherhait willen so haben wir In dafuer zu ainem rechten fuerphant gesatzt mit gutem willen und wolbedachtem mut zu der zeit do wir daz wolgetun mochten, und mit hannden der Ersamen weisen hern Hannsen des Steger zu den zeiten Burger-maister und kellermaister und des Rats gemain der stat ze Wienn, unser haws gelegen in dem Radgêsslein zu Wienn zenagst Hirssen des kramer haws, Mit der beschaidenhait, ist das wir sy der vorgenanten Summ phenning nicht ausrichten und bezaln zu den têgen sovorgeschriben stet, so ist das unser gueter will, und suellen auch sy dann gantzen vollen gwalt haben mit dem ege-nanten haws Irm fuerphand, Iren frumen zeschaffen mit verkauffen versetzen wem sy wellen nach der Statrechten zu wienn soverr das sy des vorgenanten Irs gelts haubtguts, und ob sy des icht schaden nement, gantz und gar davon verricht und gewert werdent. Gieng In aber daran icht ab, das suellen sy haben datz uns und unsern erben unvêrschaidenleich und auf allem anderm unserm gut das wir haben in dem lannde ze Oesterreich oder wo wir es haben es sey erbgut oder varund gut wie das genant ist nichts ausgenomen. Wir sein lebentig oder tod. Mit urkund des briefs besigilt mit der vorgenanten Stat zu Wienn anhangundem GruntInsigil. Der sach ist gezeug durch unserer vleissigen pet willen der Erber Hanns Gerestenner burger zu Wienn mit seinem Anhangun-dem Insigil Im und seinen erben an schaden. Darunder wir uns mit unsern trewn verpinden alles daz stêtzenhalden sovorgeschriben stet. Geben zu Wienn an freitag nach sand Juliana tag Nach Cristi gepuerd viertzehenhundert jar darnach in dem sechsunddreissigistem jare.

Source Fulltext: Peter Peusquens