Albrecht von gotes gnaden Hertzog ze Osterreich und Markgraf ze Merhern etc. Erbern weisen und lieben getrewn. Als villeicht wol hat an ew gelangt, daz sich unser lieber gnedigister herr, und vater .. der Roemisch kayser, vervangen hat, zu der Igla ainen tag mit den Behem zuhaltten, haben wir uns durch gemains nutzs, und befridung willen, unserr lannd, und leutte gewilligt, mit merkleichem volkh mit seinen gnaden dahin, und dann fuerbasser gen Behem zuziehen, darauf uns gross darlegen geen wirdet, das wir von unsern nuetzen, und Rennten nicht vermuegen, dadurch wir ains anslags auf unser Stet, Mêrkht, und Prelaten sein ueberain worden, In demselben anslag des wir doch lieber gerietten, wenne wir des stathietten, auf ew gelegt sind Sechstausent guldein. Emphelhen wir ew und begern gar ernstleich, daz Ir uns desselben anslags halben tail auf die Phingsten schierstkuenftigen, und den andern halben tail auf sant Jarobs tag darnach nachstkoemend fuerderleich ausrichttet, und die unserm hubmaister, an unserr stat zu yedem vorgenanten tag, an alles vertzichen betzalet, zu unsern hannden, und getrawn ew wol, daz Ir darinn nicht vertziehet, damit solher gemainer nutz ewrnhalben, nicht verhindert werde, wan Ir suellet an zweifel sein, solten wir die Sachen von unsern nuetzen, und Rênnten, die wir doch dennoch darlegen, vermuegen, wir wolten ew der vordrung gern vertragen, und darumb lasset ew die Sachen nicht swêr sein. Das wellen wir gnêdicleich gen ew erkennen. Geben zu Wienn an Samstag, vor sand Jorgen tag. Anno domini etc. Tricesimo sexto. d. dux in cons(ilio)

Source Fulltext: Peter Peusquens