Sigmund von gotes gnaden Romischer keyser zu allen zeiten Merer des Reichs und zu Ungern zu Behem etc. kunig. Lieben getruen uns hat die durchluchtig fraw Barbara unser liebe Gemahel und furstinn fur-bracht, wie Sy vormals Heinrichen Heyden Burger zu Wienn ein mercklich Summ gelts schuldig gewezt sey, dorumb Sy Im ettliche Ir Cleynat zupfant gesatzt, und ouch Ire brieff doruff gegeben hab, dieselb Summ unser Burger zu Ofen der Sibenlinder, dem genanten Heinrichen von Iren wegen ußgericht und betzalt hat, das Er mit guter kuntschafft wol bewisen mag, dornach so sey Sy dem selben Heyden mer schuldig. IIC LXIIII (264), und mer Sybenhundert (700) gulden, von ettlicher Ochsen wegen, die Sy von gnaden und guetem willen uff sich genomen hat, die aber die pfant obgemelt nicht anrueren, und ouch dem Sibenlinder in siner betzalung nit zuwissen gewest sein. Als nu Heinrich Heyden von dem Sybenlinder der obgemelten Summ, dorumb dann die pfant steen, betzalt ist, und unsere gemahel dieselben pfaende erfordert hat Ir die zugeben, Spricht der Heiden solich gelt von dem Sibenlinder hab er empfangen an siner geltschuld, und nicht von der pfant wegen, und helt Ir die also vor mit listen und eygenem gewalt. Begern wir von euch Ir wollet den Heyden doran weysen und halden solich gefer zulassen, und unser Gemahel Ire ge-loeste pfant on fuerwort widerzugeben, und sich umb der andern Summe halde nach ußwisung siner brieff, die er doruber hat, uns zu sunderer dancknemkeyt und wolgevallen. Geben zu Ofen am Suntag vor sant Philipps und sant Jacobs tag, unserer Riche des Ungrischen etc. im L. des Romischen im XXVI. des Behemischen im XVI. und des Keysertumbs im dritten jaren. Ad mandatum domini imperatoris Marquardus Brisacher.

Source Fulltext: Peter Peusquens