Sigmund von gots gnaden Romischer Keiser zu allen zeitten merer der Reichs und zu Hungern zu Behem Dalmatien Kroatien etc. Kunig Erbern weisen besunderlieben und getrewn uns ist furbracht wie maister Ekharts des Goltsmid zu Wienn hausfraw von dem perg zu den kutten in unserm kunigreich zu Behem gelegen burttig und den der Ir vater gewesen sey Ir muter irs diener weis genomen, dem ettwevil guets zuebracht hab damit Sy sich in disem krieg und Irrsal zu Behem gen Wienn getzogen und da gesetzt haben da derselb Ir vater nach der egenanten Irer mutter abgang ain ander hausfrawn genomen und der solich vorgenant guet an seinen letzten zeiten geschafft hiet dasselb geschefft von ew zu krefften gesprochen, und die vorgenant Maister Ekhartinn dadurich enterbet sey worden daz uns nicht mugleich noch pilleich bedunkt, wan Sy nach des vorgenanten unsers kuenigreich und pergs Rechten, desselben guts erb ist und daz rechtleich erbet Davon begern wir e(r)nstleich und emphelhen ew auch daz Ir solich kuntschafft und weisung So ew darumb furbracht wirdet fur ew nemet verhort und der egenanten Maister Ekhartinn solich Ir erbguet volligen und viderfarn lasset als Ir daz pilleich tuet daran beweist Ir uns sunder wollgevalen. Geben zu der Igla an unser frawn tag visitationis anno etc. XXXVIto unser Reich des Ungrischen etc. in dem funftzigisten des Romischen in dem XXVI des Behemischen in dem XVI und des Kaisertum in dem vierden jarn. de mandato domini imperatoris.

Source Fulltext: Peter Peusquens