Albrecht von gotes gnaden Hertzog ze Oesterreich, und Marggraf ze Merhern etc. Getrewer lieber Burgermaister. Uns hat angelangt wie sich ze Wienn, der sterb von des laufs wegen der sich yetz daselbs erhebt hab, besunder under jungen leuten, ettwas vast anvahe, damit vil Menschen abgeen und verschaiden, und wie das Gelewtt bei den zwain Pharrkirchen zu sant Steffan, und zu sant Michel, daselbs zu Wienn dadurch vast geuebet werde, als man dann gewondleich in soelhen sachen phligt ze tuen, also dass die leut davon ettwas ein erschrekhen und einen grawen haben. Emphelhen wir dir ernstleich und wellen, daz du soelich entzig Gelewtt bey den egenanten pharrkirchen underkoemest daz das also nicht geuebet werde, damit den leuten, davon icht vorcht oder grawen aufersteen, die In ein ursach irs ableibens moechtt sein. Daran tuest du unsern willen. Geben zu der Igla an sant Marie Magdalen tag. Anno etc. Tricesimo sexto. d. d(ux) per m(agistrum) h(ubarum).

Source Fulltext: Peter Peusquens