Albrecht von gotes gnaden Hertzog ze Osterreich und Markgraf ze Merhern etc. Erbern weisen und lieben getrewn. Uns hat fuerbracht der Erber Priester, Mertt der Protesser, wie zwischen unsern getrewn, Niclasen dem Czinken, und Petern dem Strasser, da derselb Strasser das haws in der Muennsserstrass gelegen von dem yetzgenanten Czinken gekaufft hat, ain berednuess beschehen sey, ob geschech daz die kappelln in demselben haws gelegen ledig wuerd, daz dann der Strasser die dem egenanten Protesser fuer menicleich leihen solt, und wie nu dieselb kappelln ledig worden sey, und doch der obgenant Strasser, die dem Protesser zuverleihen vertziech. Emphelhen wir ew, und wellen ernstleich, Seid die Berednuess also beschehen ist, daz Ir dann den egenanten Strasser daran weiset, daz er dem egenanten Protesser dieselb Cappelln verleich, damit der Berednuess so zwischen baiden tailen ist beschehen, werd nachkomen. Daran tuet Ir gêntzleich unser maynung. Geben ze Bruenn, an Phyntztag, nach sant Dorotheen tag. Anno domini etc. Tricesimoseptimo.

Source Fulltext: Peter Peusquens