Ich Ulreich Milbitzer gesessen ze Stêmestorf, an stat mein selbs und Margreten meiner haus-frawen, der gewalt ich hab, und Ich Niclas Reysner der fleischakher ze Nustorf. Bekennen, daz uns die Erbern weisen her Hainreich der Hayden, dietzeit ainer des Rats der Stat ze Wienn und Dyetreich Starhand Burger daselbs, baid verweser, der benanten Stat Gruntpueher, ausgerichtt und ingeantwuertt habent funftzkg phundt phenning, die, Rechtt tegen, bei dem benanten Gruntpuech gelegen, und die egenanten Margreten, die Milbitzerinn und Agnesen, mein egenan-ten Reysnêr hausfrawn, von fraun Kathrein der Prechtlinn, sind anerstorben und angeerbt, als Ire Rechtt und nagst erben nach Innhaltung Irer beweisten frewntschaft und die vorgenant Agnes hat, mir egenanten Reystnêr iren tail an den benanten funftzkg phundten, ledikhlich geschafft, nach lautt Irs gescheffts, das im Statpuech ze wienn geschriben stet, und darumb sagen wir egenant Ich Ulreich Milbitzer, an stat mein selbs und Margreten meiner hausfrawn, und Ich Niklas Reysner auch an stat mein selbs, und fuer all unser erben, die obgenanten verweser der Stat Gruntpueher, und all Ir nachkoemen, der vorgenanten funftzkg phundt phenning, Quitt ledig und los vor aller ansprach und vordrung ungevêrlich. Mit urkund des brieffs Besigelt mit der Erbern Niklasen des Burger, dietzeit kamrer der Stat ze Wienn, und Ulreichs Warnhover Burger daselbs aufgedrukhten Insigeln, die wir zu getzeugnuess der sachen mit vleizz darumb gepeten haben In und Iren erben an schaden. Darunder wir uns mit unsern trewn verpinden stetzehaben das an dem brief geschri-ben stet. Geben an Montag nach Invocavit in der Vassten. Anno domini Millesimo Quadringente-simo Tricesimoseptimo.

Source Fulltext: Peter Peusquens