Albrecht von gotes gnaden, Roemischer Kuenig, zu allentzeiten merer des Reichs ze Ungern, ze Behem, Dalmacien Croacien etc kunig, Hertzog ze Oesterreich etc. Erbern weisen und getrewn lieben. Als wir ew vormaln geschriben, und empholhen haben, daz Ir ew mit unsern Haubtleuten, gen der Igla fuegen soltet, und da verrer unsrer botschaft wartten. Begern wir an ew, und bitten mit sunderm vleiss, ob Ir daselbshin nicht koemen wert, daz Ir ew noch an vertziehen, mit denselben unsern Haubtleuten, dahin fueget, und dann mitsambt In fuerderleich zu uns herin, in das veld koemet, und tuet darin kein vertziehen. Das wellen wir gen ew gnedichleich erkennen. Geben im veld, vor dem Tabor, an freitag vor sand Gilgen tag. Anno etc. tricesimo octavo, unserr Reiche etc. im ersten jar, under unserm Secret. com(missi)o d(omini) r(egis) in cons(ilio).

Source Fulltext: Peter Peusquens