Wir Peter von Gotes gnaden, pischolf ze Pasel, und obrister phleger und verweser der pharre chirchen sand Stephans ze Wienne an unsers Herren stat Herzogen Rudolfes von Osterreich. Tun chund allen den die disen prief lesent oder horent lesen, die nu lebent und hernah chunftich sint. Daz wir gelobt haben bei unsern gnaden und bei unsern triwen, dem erbaern Ritter hern Otten, hern Haimen Enenkel von Wienne, daz wir in mit gantzzen triwen fudern ane alle arge liste an der vreiunge seiner chappellen, die er gestift, und gepawen hat an seinem hause, in Eren Gotes, und unser vrowen, gegen unserin pruder maister Pauleine, ob er an der pharre chirchen sand Stephans da ze Wienne bestaetiget wirt. Also, daz die vorgenant sein chappelle gevreiet werde von der pharre chirchen sand Stephans ze Wienne. Als ander vreie purger chappellen von der pharre chirchen sand Stephans ze Wienne gevreien sint. Wir tun auch chund, daz wir unsern willen und unser gunst dar zu geben haben dem vorgenanten hern Otten, daz er die vorgenanten seine chappellen die er gestift hat in Eren gotes und unser vrouwen, daz er die weihe und widme, ane schaden der pharre chirchen sand Stephans ze Wienne daz ir irz rehten niht enzogen werde. Also, ob iz mit pet der vorgenant her Otte behaben mach von dem erbaern Herren Pischolf Wernharten von Pazzawe. Und ze ainem urchunde dieser vreiunge ob er ir gewert wirt, und auch ze ainem urchunde daz er der pharre chirchen irz rehten iht enziehen welle, dar umbe so hat der vorgenant her Otte beschaiden der pharre chirchen sand Stephans ze Wienne, seins rehten chauf gutes zwai phunt wien-ner phenninge geltes purchrehtes auf des Metzzen hause daz da leit in sand Johanser strazze da ze Wienne, die man ir davon dienen sol ewichlichen alle Jar ze drin zeiten in dem Jare, ze weihenahten zehen und funf schillinge, an sand Jorgen tage zehen und funf schillinge, und an sand Michels tage zehen und funf schillinge wienner phenninge mit allem dem reht als man ander purchreht ze Wienne dient, und geben im dar uber disen prief ze ainem urchunde und ze ainer vestnunge dieser sache versigilten mit unserm Insigil, und sint auch des geziug her Hainrich ze den zeiten chormaister ze Wienne, maister Otte, her Jordan, her Hainrich der Paier, her Starchant, her Walther, her Johan, her Fridrich, die priestere, maister Perhtolt, obrister schriber unsers herren Herzogen Rudolfes von Osterreich, her Chunrat von Praiten-velde, her Hainrich, sein pruder, her Greiffe, her Hayme, her Chunrat, der hubmaister, her Pilgreim, hern Paltrames sun, her Hainrich, sein pruder, her Ulrich bei den minnern prudern, her Chunrat der Valchenstainer, und ander frume leute genuch. Dieser prief ist geben ze Wienne, do von Christes geburt waren ergangen Tausent Jar, dreu hundert Jar, In dem Ersten Jahre dar nah, des naehisten freitages nah sand Peternellen tage.

Source Fulltext: Peter Peusquens