Ich Marckhard Newßwerg zu der wyse Bekenne oeffennlichen mit dem brief fuer mich mein eliche hawsfrawen alle unnserr erben und Nachkomen, daz wir recht und redlichen verkauft und zekauffen geben haben und verkauffen auch in kraft diß briefs Micheln und Jacoben den kolern gebruedern und ir beder erben unnser halbe Muel zu der wyse mit aller und iglicher irer zuge-hoerunge. Auch mit allen eren nuetzzen und rechten und inn massen als wir die ynnen gehabt und auch herbracht haben nichtz außgenomen noch hindan gesetzt ungevêrlichen. Und die selben halben Muel haben wir In geben und verkauft umb ein summ geltz der wir gar und gentzlichen gericht und betzalt sein on allen unnsern schaden und on alles gevêrde. Und auf daz so vert-zechen wir unns der vorgenanten halben Muel mit aller und iglicher irer zugehoerunge auß unnserr und allerr unnserr erben hant und gewalt inn der vorgenanter koler und irer erben hant und gewalt Also daz wir noch nymant anders von unnsern wegen fuerbaßmer kein ansprach oder vordrung darnach nymmermer haben oder gewynnen soellen noch wollen weder mit recht noch an recht gaistlichen oder werltlichen noch suenst in keinerleyweis wie daz erdacht moecht werden on alles gevêrde. Wir soellen und woellen In auch die vorgenante halb Muele mit irer zugehoerung mit lehenschaft in Ir hantt bringen von der Stift zu Bamberg von dannen die zue lehen rueret und darnach die vertigen vertreten und versprechen mit dem rechten von wem oder wie oft In die angesprochen oder geirret wuerd mit dem rechten und Sie der weren als lehens und auch lannts recht ist on allen Iren schaden und on gevêrde. Und ob auch hinfuer icht brief funden oder fuer-bracht wuerden die do lautten ueber die vorgenanten Muele mit irer zugehoerunge die sollen den vorgenanten kolern und auch iren erben keinen schaden bringen on alles gevêrde. Des zu urkund gib ich vorgenanter Marckhart Newßwerg fuer mich und alle meine erben den vorgenanten kolern und iren erben den brief versigelt mit der Stat Sultzpach Anhangendem Insigel daz die Ersamen und weisen die Burger des Rats der Stat do selbst durch unnserr vleissigen bet willen zu einer getzeugknuesse des obgeschriben kaufs daran gehangen haben, dem Rate und der Stat on entkelt und on schaden, darundter wir unns verpindten alles daz zuehalden und zuevolfueren, das von unns an dem brief geschriben steet, des sein geladen zeugen die Ersamen weisen Herman Hiltner und Ulrich Spies Der brief ist geben Nach Cristi gepurt virtzehenhundert und in dem virtzigisten jaren des nechsten Montags nach dem Heiligen Ostertage

Source Fulltext: Peter Peusquens