Ich Oswalt Purkchartsperger burger ze Wienn Vergich fur mich und all mein erben und tun kund offenleich mit dem brief daz wir unverschaidenleich schuldig worden sein und gelten sullen, dem erbern weisen Micheln dem Stadl burger ze wienn und seinen erben dreytzehen phund wienner phenning der swartzen munss, der wir Sy oder wer den brief mit Irem gutem willen innhat und uns damit mont unvertzogenleich ausrichten und betzaln sullen und wellen auf sand Mertten tag schiristkuenftigen. Tuen wir des nicht was Si dann der vorgenanten Summ phenning furbaser schaden nement, wie der schad genant ist oder wirdet, den ainer ungesworn mit slechten worten gesprechen mag, der den brief furbringt. Denselben schaden mitsambt dem vorgenanten haubtgut geloben wir In mit unsern trewn an furpot an klag, und an alles berechten gantz auszerichten und widerzekern an allen Iren schaden. Si sullen auch haubtgut und schaden haben zu mir und meinen erben unverschaidenlich, und auf allem unserm gut das wir haben in dem lannde ze Osterreich oder wo wir er haben Es sey Erb oder varundguet, wie das genant ist nichts ausgenomen wir sein lebentig oder tod. Mit urkund des briefs besigilt mit der erbern Hannsen des Marchegker burger ze wienn, und Ulreichs des Menkchover Aufgedrukten Insigiln, die ich zugezeugnuss der sach mit vleiss darumb gepeten hab In und Iren erben an schaden. Darunder ich mich mit meinen trewn verpindt stetzuhaben sovor geschriben stet. Geben ze wienn an sand Ambrosien tag Anno domini etc. Quadragesimo.

Source Fulltext: Peter Peusquens