Albrecht von gots gnaden Hertzog ze Osterreich etc. Erbern weysen und lieben getrewn. Wir haben ewr antwurtt, uns yetz widerumb getan, wol vernomen, darInn Ir vermeldet, wie wir, nach allem herkomen, wol muegen versteen, daz Ir unser brief, und botscheft, an wissen, und willen des Allerdurleuchtigisten fuersten, Hern Fridreichs Roemischen Kunigs, und Hertzogen ze Osterreich etc., unsers brueders nicht pilleich aufnemet noch verhoeret. Auch wie uns wissent-leich sey, daz durch veraynigung Gemainer lantschafft, derselb unser brueder, durch die Lanntschafft, und ew, zu ainem verweser, und vormund, als der Elter aufgenomen sey, den Ir auch, fuer ainen Gerhaben der Kuniginn Sun haltet, und kainem anderm Gerhaben, dann Im gehorsam und gewerttig wisset zesein. Darauf lassen wir ew wissen, daz wir wol ingedenkch sein, daz wir nach abgang weilent unsers lieben Herren und Vettern Kunig Albrechts etc. loblicher gedechtnuess, zu gmainer lanntschafft gen Wienn gesanndt, und unser fuerbringen, und begerungen, von unrerr gerechtikait wegen, als weilent unsers lieben Herren und vater, Hertzog Ernsts Hertzogen ze Oesterreich etc. guter gedechtnuss Sun, getan, und solchs vast zu derselben lantschaft gesatzt haben, uns von allen unpilleichen sachen weisen ze lassen, da uns under menigerm anderm, durch der lanntschaft trefleich botschaft, zu uns gesant ist zuogesagt worden, Es weer wol betrachtet, daz unser bruder, und wir, vor allen dingen verainet solden werden, dem aber nicht nach ist gegangen, und sein also, in allen sachen untzher aufgeschoben, das alles wissentleich ist, Und so es sich gebueret, wol sol fuerbracht werden, und nach allem herkomen, wir nicht versteen, daz ew, als undertanen zugepure ewern erbleichen rechten, natürleichen Herren, des Ir nicht in gewaltsam seyt, wider seiner frawn und Muoter, auch unser, als seines nachsten frewndt wissen, zubesetzen, und daz Ir unser brief und botscheft nicht sullet verhoeren, solten aber dieselben verhoert sein worden, so hietet Ir, und ander, lautter verstannden, daz wir die sachen nicht anders für uns heten genomen, dann dem loebleichen Haws Oesterreich, unserm lieben vettern Kunig Lasla, seinen lannden und lewten, zu Eren, nutz, und frumen, wie aber dem ist, so mainen wir auf all soelh verhandlung, wider uns beschehen, unsers lieben vettern Kunig Lasla, auch unserr lieben frawn und Mueter der Kunigin, und unserr gerechtikait, nach dem, und wir desselben unsers lieben vettern in gwaltsam sein, nachzekomen, und uns der, gen ew, und andern den seinen, als sein Gerhab und verweser zehalten. Davon ermonen wir ew aber, als ain Gerhab, und verweser, des benanten ewrs erbleichen, und Natürlichen Herrn Kunig Lasla, soelher aid, glubd, und trewn, so Ir Im, als dem Rechten Erben schuldig seyt, daz Ir uns noch, an lenger vertziehen zu seinen hannden und Rechten gehorsam tuet, Und ew, als undertanen, in widerwërttikait nicht lasset merkchen, daran tuet Ir ewern aignen frumen, dadurch man auch, grosser müe und schadens vertragen wirdet. Ewr verschriben antwurtt, lasset uns widerumb wissen. Geben zum Vorchtenstain an Sand Marxen tag Anno etc. quadragesimo. d. dux in consilio.

Source Fulltext: Peter Peusquens u. Birk in den Quellen und Forschungen zur vaterländischen Geschichte 238-239 n° 3.