Albrecht von gotes gnaden Hertzog ze Osterreich etc. Erbern weisen, und lieben getrewn. Als wir nachst mitsambt unserr lieben frawn und Muoter..der kunigin ze Ungern, und Hertzogin ze Osterreich etc. bey unsern Erbern botscheften, mit unsern briefen zu gemainer lanntschaft in Osterreich, und ew gesandt haben, die Ir aber nicht habt verhoern wellen, das uns vast unpillich bedunkchet, und maynen so Ir das recht betrachtet, daz Ir uns noch ew des nicht schuldig seytt. Wie aber dem ist, so habent uns dieselben unser Ret gesagt, daz der Burgermaister, und ander ettlich, der bey unserr frawn der kunigin offen brief ew lauttund darnach an Irer herberg von In emphangen haben, den Ir nu wol habt vernomen. Also begern wir an ew mit ernst, und ermonen ew auch darauf, als ain Gerhab, und verweser des durleuchtigen fursten, unsers lieben vettern Kunig Lasla, ewrs Rechten naturlichen Erbherren, alles des, so wir ew, von aid trewn, und Eren wegen. So Ir weilnt unserm gnedigen lieben herren und vettern, Kunig Albrechten, loblicher gedechtnuss, und seinen leiberben, schuldig seytt, daz Ir das aigenlich betrachtet, und uns darauf fuerderlich antwurttet, daz wir uns darnach kunnen gerichten, nach dem, und wir uns des, dem benanten, unserm lieben Vettern Kunig Lasla, ewerm Erblichen Herren, zu dinst, und sunderer frewntschaft, als sein nachster frewndt und ainer von Osterreich haben vervangen, daran tuot Ir unser ernstliche maynung. Geben zum Vorchtenstain an freitag vor sand Jorgen tag. Anno domini etc. Quadragesimo. d. d(ux) per se ipsum

Source Fulltext: Peter Peusquens u. Birk in den Quellen und Forschungen zur vaterländischen Geschichte 237-238 n° 2.