Wir Fridreich von gotes gnaden, Romischer Kuning, zu allen zeiten Merer des Reichs, Hertzog ze Osterreich, ze Steir, zu Kernden und zu Krain, Grafe zu Tirol etc. Bekennen fuer uns und unser erben, und tun kunt, offenlich mit dem brief. Als die Erbern weisen, unser lieb getrewn..unser Burger hie zu Wyenn, nach emphelhnuss weilnt unsers lieben vettern, hern Albrechts, Romischen etc. kunigs, und Hertzogen ze Osterreich etc. loeblicher gedechtnuss, auf aufrichtung der Prugken, die ueber die Tuonaw sullen, gemacht werden, umb zymerholtz und ander notdurfft, nie ain merkliche Summ gelts, ausgegeben haben, und noch hinfuer als versehenlich ist, gross darlegen darauf tuon muessen, untz die gar volbracht werden, als Sy uns habent fuerbracht, und dadurch an uns begeret, unser hilff mit gelt auch dartzuo ze tuon, damit dieselben prugken desterfuerderlicher gemacht und zuogericht werden, Haben wir denselben unsern Burgern, vollen und gantzen gewalt gegeben, und geben auch wissentlich in krafft des briefs, waz Sy von anevang untzher, auf dieselben prugken ausgegeben haben, und noch hinfuer darauf wissenlich ausgeben werden, daz Sy sich desselben gelts und ausgeben, alles, von den nutzen und Rennten, was der kuenffticlich zu prugkmiet von denselben prugken gevallen werdent, am ersten fuer meniclichen selber entrichten und der gentzlichen betzaln sullent und mugen, und sullen wir noch unser Ambtlewt, die wir unsers tails bey denselben prugken haben werden, Sy daran nicht Irren noch hindern in dhain weis ungeverlich. Was aber derselben prugkmiet ueber solh darlegen und ausgeben ueberbeleibt, oder was der hinfuer nach zurichtung oder was auf pessrung, derselben prugken, alltzeit geet, ueberbeleiben wirdet, daraus sol uns halber tail gevallen, und der ander halb tail, sol gevallen unsrer egenanten Stat, und den Burgern hie ze Wyenn, als das des egenanten unsers lieben vettern brief, den dieselben unser Burger darumb habent lautter ausweiset. Mit urkund des briefs. Geben zu Wyenn an freytag, vor dem heiligen phingstag, nach krists geburd in dem viertzehenhundert und viertzigisten Jare, unsers Reichs im ersten Jare, under unserm Insigel, das wir in unsern fuerstentumben untzher gebraucht haben. Prescripta recognoscimus commissio propria domini Regis

Source Fulltext: Peter Peusquens u. Leopold Matthias Weschel, Die Leopoldstadt bey Wien, Anh. II n° 8.