Ich Michel Lienvelder burger ze Wienn Bekenn fur mich und all mein erben und tun kund offenleich mit dem brief, daz wir unverschaidenleich schuldig worden sein, und gelten sullen dem erbern Ludweigen Ridler burger ze Muenchen und seinen erben zwayhundert und vierdhalben guter newer ungrischer guldein gerecht in gold und wag, oder aber fur yeden guldein zway-hundert wienner phenning der alten swartzen muenss, und wir sullen Sy auch kain andrew werung anpieten. Der vorgenanten Summ gelts wir Sy oder wer den brief mit Irem guetem willen innhat und uns damit mont unverzogenleich ausrichten und bezaln sullenn und wellen auf sand Kathrein tag schiristkuenftigen. Tun wir des nicht, was Sy dann der benanten Summ gelts furbaser schaden nement, wie der schad genant ist, oder wirdet, den ainer ungesworn mit slechten worten ge-sprechen mag, der den brief furbringt. Denselben schaden mitsambt dem vorgenanten haubtgut geloben wir In mit unsern trewn an furpot an klag und an alles berechten gantz auszerichten und widerzekern an allen Iren schaden Sy sullen auch haubtguet und schaden haben zu mir und meinen erben unverschaidenlich, und auf allem unserm gut das wir haben in dem lannde ze Osterreich, oder wo wir es haben, Es sey Erb oder varund gut, wie das genant ist nichts aus-genomen wir sein lebentig oder tod. Mit urkund des briefs besigilt mit meinem Anhangundem Insigel. Der sach ist gezeug durch meiner vleissigen gepet willen, der erber Ulreich Menkchouer mit seinem Anhangundem Insigel Im und seinen erben an schaden. Geben ze Wienn an freitag nach sand Jacobs tag im schnit Nach kristi gepurd viertzehenhundert jar, darnach in dem viertzigistem jare.

Source Fulltext: Peter Peusquens