Fridreich von gotes gnaden Romischer Kunig zuallenzeiten Merer des Reichs Herzog zu Osterreich und zu Steir etc. Erbern weisen lieben getrewn. Von solher zwitrecht und zwayung wegen, so sich zwischen ettlichen Studenten unsrer universitet zu wyenn, ains tails, und unsers StatRichters daselbs, und seinen knechte des andern, erhebt und begeben haben, die uns vast missvallen . Emphelhen wir ew und wellen ernstlich, daz Ir darob seyt, daz derselb unser Richter, sein knechte, helffer und guenner, mit den egemelten Studenten, und allen andern Studenten, der vorgenanten unser universitet in ungueten nichts ze schaffen noch zu hanndeln haben, des-gleichen wir auch .. dem Rector und den Maistern derselben unsrer universitet, widerumb zetuon empholhen haben, wan wir uns in khuertz hinueber gen wyenn fuegen oder unser Reet schiken wellen, die sachen baider seit zu verhoern, und nach ainem pillichen zu entschaiden soverr uns das als lanndsfuersten zugebueret, und ob Ir vernemen wurdet, das baid tail, oder ainer wider den andern, ettwas datzwischen anheben mainten, daz Ir des vor seit, untz an uns. Das mainen wir. Geben zu der Newnstat an freitag vor dem Newen Jarstag. Anno etc. quadragesimo primo unsers Reichs im ersten jare. com(missi)o propria domini regis.

Source Fulltext: Peter Peusquens