Fridreich von gotes gnaden Roemischer Kuenig zuallenzeiten Merer des Reichs. Hertzog zu Osterreich und zu Steir etc. Erbern weisen und lieben getrewn. Als Ir uns am nagsten von eins Burgermaister und Rates wegen zu Wienn geschriben und die zedeln von den genanten, nach alter gwonheit, habet zugeschikt . Haben wir vernomen und lassen Ew wissen, daz wir unsern lieben getrewn . Leupolten von Egkkartzaw. Rappern vom Rosenharts unsers lieben Muemlein Junckfrawn Annen. Hofmaister, und Thomann dem Wisent unserm Hubmaister in Oesterreich empfolhen haben an unserr stat, von unserm getrewn lieben Conradten dem Hoeltzler unserm Burgermaister und dem Rate so wir gesetzet und aufgenomen haben, als wir In die an einer zedeln vermerckt zugesanndt haben, gwondlich aid und geluebde aufzenemen, als Sy Ew werdent zu erkennen geben . Empfelhen wir Ew ernstlich und wellen, welich dieselben, der von Egkkartzaw .. der vom Rosenharts und .. der hubmaister. Si all drey, oder Ir zwen aus Ew von unsern wegen zu Rat, nach lautt derselben zedeln, vordern werden, und die nicht vor im Rat gewesen sein, daz uns die in gegenwurtikait .. des Rectori, der Lerer und Maister unserr universitet zu Wienn und derselben unserr Rete sweren als sitlich und gwondlich ist. und als wir In das empfolhen haben. Welich aber vor das vergangen jar im Rate sein gewesen, daz uns die, bei dem ayd den Si uns vormalen getan habent geloben, als das vor auch mit alter herkomen ist. Daran tut Ir unsern willen. Geben an freitag sand Fabians tag, anno etc. XLI°, unsers Reichs im ersten jare. com(missi)o domini regis per cons(ilium).

Source Fulltext: Peter Peusquens