Fridreich von gotes gnaden Romischer Kunig zuallenzeiten Merer des Reichs, Hertzog ze Oesterreich und ze Steir etc. Getrewr lieber Burgermaister. Wir haben empholhen, unsern lieben getrewn Lewpolten von Ekchartzaw, unserm Rate, Rappen vom Rosenharts, und Thomann dem wisent unserm Hubmaister, von dir auf den aid, den du uns vormaln, als Purgermaister hast getan gewondlich geluebd aufzenemen. Also ist unser maynung, und emphelhen dir, wenn Si all oder Ir zwen des von unsern wegen, an dich begern, daz du In dann an unserr stat solich geluebde tust, in gegenwurttikait der lerer und maister unserr Schul, und denn bestellest, daz die Newn Ratleut darnach auch swern, und die alten Ratleut geloben, als gewondlich ist, und als wir dir, und dem Rat, das mit unserm sundern brief, yetz auch schreiben. Daran tust du unsern willen. Geben an Freitag sand Fabian und sand Sebastian tag. Anno etc. Quadragesimo primo, unsers Reichs im ersten jare. com(missi)o propria domini Regis.

Source Fulltext: Peter Peusquens