Fridreich von gotes gnaden, Romischer Kunig zu allentzeiten Merer des Reichs, Hertzog ze Osterreich und ze Steir etc. Erbern weisen und lieben getrewn. Wir lassen ew wissen, als yetz die Durleuchtigist fuerstinn unser liebe Muom..die kuniginn von Hungern an dem gevert Irs herkomens zu Oedemburg ist gewesen und uns das verbotschefft hat, haben wir unser Botschafft zu Ir daselbs hin getan, und mit Ir lassen reden von solher angriff wegen, die von Teben in unser lannd nu ettwieofft sein geschehen die zu underkomen, darauf uns dieselb unser Muom..die kunigin hat zuempoten und vertroestung getan, wie Sy den Lasslawen Wan underweisen, und dafuer sein wolle, daz er und die seinen hinfuer uns und den unsern kainen angriff mer tuon sullen und wie Si In auch darauf mit Ir herbringen wolt. Es hat auch derselb Lassla Wan uns und unsern Reten zugeschriben wie Im solich angriff laid sein, und well auch die underkomen, damit uns die fuerbazzer nicht mer sullen beschechen, In dem ist dieselb unser Muom..die kunigin herkomen, aber derselb Lassla Wan, ist nicht mit Ir komen, von des wegen Si an uns hat begeret, daz wir Im wolten unser Gelaitt geben, das wir Im auch auf solich maynung und vertroesten gegeben haben. Darauf er also ist herkomen, und dieweil er ist hie gewesen, habend sich die sein, von Teben aws vor den und auch vor Im, wir uns und die unsern nicht haben wissen fuertzesehen, erhebt und gen Vischamund gefuegt, den markcht und die Doerffer daselbsumb, ausgehebt, und grossen schaden mit Raub prant und toettung der leut getan, auch die leut und Ir Guot von dann gefuert. Das alles uns und den unsern in demselben unserm Gelaitt von Im und den seinen aws seim Gesloss und darIn ist beschechen. Darauf uns die unsern menigermal habent angerufft dartzuo zetuon. Also daz wir drey tag nacheinander mit Im haben reden lassen, daz er wolt gedenkhen, den unsern solichen schaden zwidertuon, und nach dem als er nicht daran hat getan, haben wir In mit guoter vorbetrachttung und mit zeitigem Rat, nach solhem der unsern fleissigen anruffen, geschafft zu unsern hannden ze nemen, und das getan, von unserr und der unsern, auch des lanndes merkhleichen notdurfft wegen, als das villeicht nu wol an ew hat gelanngt, und begern an ew und pitten mit sunderm fleiss und ernste, daz Ir uns zuwolgevallen hundert fuessknechtt eylund gen Haimburg schikhet, und den auf ain zeit emphelhet, da ze sein, den wir auch ainen hauptmann wellen zuschaffen, damit dasselb unser Geslos yetz in disen leuffen, desterpas bewaret, und furgesehen werde, da wir denn verrer den sachen mainen nachzugedenkhen wie fuerbazz darinn zu hanndeln sey. Und Ir erzaigt uns daran ainen lieben dienst, den wir gnedicleichen gen ew wellen erkennen. Geben zu der Newnstat, an Suntag vor sand Peters tag, ad Kathedram. Anno domini etc. quadragesimo primo unsers Reichs im ersten Jare. com(missi)o domini Regis propria.

Source Fulltext: Peter Peusquens; siehe auch: Schlager, Wiener Skizzen, N. F. 3, 496-498