Fridreich von gotes gnaden Romischer Kunig zuallentzeiten Merer des Reichs, Hertzog zu Osterreich und zu Steir etc. Erbern weisen und lieben getrewn. Wir lassen ew wissen, daz wir yetz unser lanndlewt von Osterreich, von unserr, und des lannds merklichen notdurfft wegen, auf den phincztag in der Osterwochen schirstkunfftigen, gen Wyenn haben gevordert, sich daselbsthin zu unsern Reten zu verfuegen. Emphelhen wir ew und begeern mit ernste, daz Ir ettlich aws ew dartzuo gebet, denselben tag auch zu besuchen, und soelh werbung, von den egemelten unsern Reten, mit andern unsern lanndlewten aufzunemen, und denn da mitsambt In, solh unser und des lannds notdurfft und gebrechen gedenkhen fuerhannden zenemen, damit darInne, unser und des lannds nutz und frumen, fuergenomen, und betrachtt werde, wan Ir wol versteet, daz des in disen lewffen merklich notdurfft ist. Daran begeet Ir unsern willen. Geben an dem Suntag so man singet Judica in der Vasten. Anno etc. quadragesimo primo. Unsers Richs im ersten Jare. com(missi)o domini Regis per cons(ilium).

Source Fulltext: Peter Peusquens