Namhaftigen Ersamen und weysen besunder Gunstig herren unser dienst bevor In stetem willen fursichtig herren wir lassen euch wissen das am gestrigen tag unserer gnedigsten frawen der kunigin, von Kaschaw aus der Leutsch, und andern Irn genaden Steten merlay briefleicher potschaft kommen sein, das her Giskra, haubtman zu Kaschaw mit den veindten die vor im gelegen sein hat tan ein vechten in die pasteg zeruett, gewaltsamlich seu daraus geslagen und daruber verprannt hat (auch) der .............. zwayhundert nider erlegt und ettlich namhaft aus in gevangen hat dy andern all fluchtig sein worden. Daruber er sich hat gesammet und selbs ze velt ligt und hat wol achtzenhundert gueter geraysiger an die ze fuessen sich wider die veindt damit ze halten. Auch Gunstig herren lass wir euch wissen das unser genedigiste fraw die kunigin in tayding ist gewesen Mit dem burggraven zu Teben umb das haws das er Irn genaden bey treun und Ritterlichen Eren umb ain Summ gelts versprochen hat ab zetreten und des gelts ain tail enphanngen hat. Daruber Irn genaden gesworn aver nu Irrung darInn sucht, daz (wir) unser nit konnen versehen daz er dez haws werd abtreten. Datum ze Prespurg an Erchtag vor Nativitatis Marie virginis gloriose anno domini etc. xl primo Richter und Rate der Stat zu Prespurgk

Source Fulltext: Peter Peusquens