Fridreich von gots gnaden Romischer Kunig zuallenzeiten Merer des Reichs Hertzog zu Osterreich und zu Steir etc. ERbern weisen und lieben getrewn. Als wir die lantschaft in Osterreich auf den nachstvergangn sand Giligen tag gen Wienn gevordert haben durch merkchleicher notdurft willen die dem lannd swerleich anliggund sind, da aber der lantleut der mynner tail komen und unserm emphelhen gehorsam gewesen ist, dadurch solich gross sachen hinterstellig beliben und nicht gantz zu austragung komen sind, durch abwesens willen, der die den tag nicht besucht habent, und wan wol mag an ew gelangt haben, wie es zu disen zeiten umb des lanndes nutz und Rennt steet, von den wir und unser Anwelt in Osterreich, die sich der Anwaltschaft auf unser ervordrung und der lantschaft pet und vertrostung habent vervangen, willig wern, all notdurft des lanndes auszerichten, wenn der ichts vorhannden wer, daran aber grosser abgankh ist, und das lannd ditzmals in den kriegen, von Behem Merhern und Hungern und in andern sweren notdurften, an der lantschaft sunder betrachtung nicht mag furgesehen werden als des notdurft ist. Davon emphelhen wir ew aber, begern mit ernste und ermonen ew von unsern und des lanndes notdurft wegen daz ir vier aus dem Rat, und vier aus den Genanten mit vollem und gantzem gewalt, auf aller heiligen tag schiristkunftigen an alles vertziehen gen sand Poelten schikhet, damit solh gross notdurft, des lanndes durch die und ander aigenleich gewegen und das lannd in frid pracht werde, wann geschech des nicht des wir doch nicht getrawn, und das lannd noch in grosser bekuemernus komen werde als des zu besorgen ist, so versteet menicleich wol, an wem der abgannkh ist, davon getrawen wir ew wol, daz Ir ew des nichts Irren lasset als Ir uns dem lannd und ewselbs des schuldig seit Das wellen wir in sundern gnaden gen ew erkennen. Geben an sand Michels tag. Anno etc. XLImo unsers Reichs im andern jar. commissio propria domini Regis ....... .......

Source Fulltext: Peter Peusquens; siehe auch (fehlerhaft): Kollar, Analecta 2, 987 n° 46