Von gottes genaden Albrecht phallnntzgrave bey Rein Hertzog In Bayern und Grave zuo voburg etc. Unnsern gunstlichen grus bevor fursichtig und weys unns sunderlieb. Als Ir uns yezo von unnser Burger zuo Munchen wegen mit namen Hannsen Urssentalers und Hannsen Vachners under anderm geschriben und gebeten habt, sy daran ze weysen und mit In ze schaffen daz sy sich an Recht von ewrm mittburger Hannsen Kewschen vor ewrm StatRechten benugen und solich geRicht zuo Westvaln vallen lassen nach Innhalt ewrs briefs, haben wir wol vernomen. Allso tuen wir ew zewissen, das wir von ewr pet wegen mit den obgenanten unsern Burgern geredt, und sy sovil erweist haben, daz sy Ire Recht zuo Westvaln gen dem Kewschen ansten lassen wellen, wie wol sy dez als sy mainen nicht schuldig waern, doch allso das In von ewrn Burger umb Ir schuld onver-ziehen fuderlich und enndtlich Recht vor ewrm dem StatRechten und bezalung widerfar und vollgee, herauf so begern wir mit sunderm ernst von ew, Ir wellet den unsern gen ewrm Burger allso In kurtz und onverziehen Rechttag beschaiden, und umb Ir schuld gen Im enndtlich Recht und bezalung ergeen und widerfarn lassen als ewer Stat Recht, und so das beschehen ist, wellen sy Ire westvalische Recht alsdann ganntz vallen lassen, verstet Ir selbs wol daz die unsern daran genug und mer tuen dann sy schuldig sein. Beschaeh aber dez nicht, und wird In der sach In obgeschribner maß nicht In kurtz ennd So muesten wir In vergoennen daz sy Irn angefangen westvaelischen Rechten fuero gen dem ewrm zuo ennd nachgiengen als sich gebuerte und Ir notdurfft waere. Geben zuo Munchen an mittichen vor sanndt Michels tag Anno domini etc. XLImo.

Source Fulltext: Peter Peusquens; siehe auch: Tomaschek, Rechte und Freiheiten 2, S. 47, n°139.