Ich Stephan von Hachenberg Bekchenn fuer mich und all mein erben, und tuen kchund offenleich mit dem brieff allen den er fuer kuembt lebentigen und chuenfftigen, das fuer mich cham der Erber knecht Hanns der Chriminger an stat sein selbs und seiner prueder, Lienharten und Paulen der chriminger, und gab mir ze erkchennen, wie sy einen halben hof, der yetzt oed ist, gelegen ze Pokchflies an der wintter zeil, zwischen Hansen des Nechen und Andre dem Nepauren, dorin gehoeren aindleff ieuch akchers und ein viertail. Item darnach drey oed hofmarich auch gelegen ze Pokchflies zwischen Anna der füererin und Chuentzen des Pruenssen, und ain oede hofmarich gelegen zwischen Syman Landtsidel und Hansen Chreucher, dorin gehoerent ain halb ieuch weingarten genant das goeldel, gelegen an Freinperg und ein drittail ieuch akcher gelegen im Muelfeld, das alles von mir zelehen ruert der Pergawer lehenschafft, und pat mich mit vleis, das ich im und seinen benantten pruederen uerlaubt den halben hoff mit den benantten êkcheren, darzue die egemelten hofmarich weingerten und aekcher mit allen iren zuegehoerungen ze freyem puerkchrecht auszegeben, und was er und sein benantt brueder auff die obgemelten gruent ze freyem puerkchrecht dienst auffsetzen werden, den selben dienst wellent sy von mir und meinen erben ze Rechtem Manlehen haben, und emphachen als lehens und des landts ze Osterreich recht ist. Also hab ich angesechen sein fleissig pet und auch seiner prueder, und hab da durch und von sunderem guetleichem willen an stat mein selbs und meines vetteren hern Fridreichs von Hochenberg meinen gunst und willen darzue geben. Gib und uerlaub Im wissenleich mit dem brieff, das sy den obgenanten halben hof, hofmarich weingaertten und aekcher muegen ausgeben ze freyem puerkchrecht dienst, und was sy dienst dorauff setzen werden, den schuellen sy fuerbas von mir und mein und meins benantten veteren erben ze rechtem manlehen haben und emphachen, nuetzen und niessen, als lehens und des lands ze Oesterreich recht ist ungevêrleich. Mit uerkchund des brieffs Besigelt mit mein und meins veteren hern Fridreichs von Hochemberg unser peder anhangenden insigil. Geben nach Christi gepuerd viertzehenhundert und im ainsund-viertzigistem iar an Mantag vor Sand Simon und Sand Judas tag, der heiligen zweliffpoten.

Source Fulltext: Peter Peusquens