Ich Kaspar Enenkchel Bekenn das ich meinem lieben Bruder Albrechten dem Enengkchel meinen gantzen und volligen gwalt gegeben hab, und gib auch wissentleich mit kraft des briefs von wegen ains halben hauss gelegen bei sand Peters freithof am Ekk ze nagst des Muensmaister haus das mich und meine geswistreid von unserm lieben vater Joergen dem Enenkchel von Albrechtzsperg seligen ist anerstorben und angeerbt. Also das der selb Albrecht Enenkchel meinn Bruder an unser allerstat verkauffen und das vertigen sol und mag mit kaufbriefen und Gruntherren als dartzue gehoeret. Auch mein tail gelts so mir daraus gepuert an meiner stat, Inzenemen und was er von mein wegen darinn handelt und tuet, das ist alles mein guetleicher will zu gleicher weiss und in gantzer kraft und macht als ich selbs gegenbuertig wêr und das tuen moecht und glob auch fuer mich und meinn erben solch verkauffen und den gegenbuertigen gwalt unwiderrueffenleich stêt zu halten und dawider nicht ze tuen noch zue sprechen in kaynerlay weis an als gevêr und des zu urkund gib ich Im den briefs versigelten mit der Edelen weisen Petern den Mulbanger und Kaspar den Prawnstorffer meiner lieben Swaeger aufgedrukchten Insigelen die ich zu zeugnues der sach mit vleiss darumb gepeten hab In und iren erben an schaden darunder ich mich mit meinn trewn verpind alles das stêt zu halden das vor geschriben stet wann ich diezeit begrabens Insigel nicht gehabt hab Geben an Erichtag vor sand Symons und Judas tag Anno domini etc. Quadragesimo primo.

Source Fulltext: Peter Peusquens