Elizabeth von gots gnaden, kunigin zu Ungern, Dalmatien, Croatien etc. Erb des kunigreichs zu Behem, Hertzogin zu Osterreich, zu Steyr, und Marggrafin zu Merhern etc. Sunderlieben getrewn. Als euch wol wissentlich ist, daz die Wolgeborn und Edeln, unser sunderlieben getrewn, die Graven von Crabaten, von anfang unsers krieges und truebsals, mit Ir selbs leyb und guet, bey und beneben uns bestanden, ratsam, und hilflich, nach allem Irem vermuegen gewesen, und auch in unserm dinste, mitsampt den Iren, gefangen worden sein, und Si yetz umb yre erloesunge ain merklich gross Summ gelts beduerffen und haben muessen, Darumb begern wir an euch, und pitten mit besunderm fleis, daz Ir umb unsern willen, in ainem solichen, dy obgenanten Graven euch trewlich empholhen lassen sein, und denselben nach ewrm vermuegen, etliche ewr stewr und hülffe tuen wellet, damit Si, und die Irn aus soelichem gefencknus dester paser erloeset werden und komen muegen, und was Ir In guets gunst also ertzaiget, das ist uns in gleicher weise so gros dank von euch, als hiet Ir uns selbs getan, und des wir euch dann auch in andern sachen gnediklich dergetzen (ergötzen-erfreuen) und in allem gutten gen euch erkennen wellen. Geben zu Prespurg, an sand Andres tag, Anno etc. XXXX primo.

Source Fulltext: Peter Peusquens; siehe auch: Schlager, Wiener Skizzen, N. F. 3, 504.