Allen und eynem itzlichem bezunder dy mit desem prife besucht werden Empitten Wir Purger-meister Ratleute und dy Elder der Stat Troppaw unsern freuntlichen dinst und vorkundigen mit diesem prife Also alz dy Erbere Katherina leipstendige tzeygerynne ditz prifes mitsampten irer armen mutter von vordechtnis und bescholdigung wegen des Erbern Panhalms purgers zu Wien in das gefenngnis brocht wurden umb forlost etzlicher cleynot und guter wegen dorumbe ouch dy Erbern frawen grose marter smertzen und wertliche schande geliden und zu dem toede vororteylt wurden und apgebeten sint und no in das fumfte yor aws Osterreich und Merhern geweist und geechtet seint wurden und in diesem yore an unserm jormargt um sand Simonis und Jude der Czwelfboten hot dy Katherina zu uns eynen knecht mit namen Augustin etwan Panhalms dyner in das gepfengnis brocht ein scholt gebende das sie von seynem wegen suttene marter und wertliche schande geliden hette mit ir mutter und in des hot dye Katherina uns gebeten umb sie den Wiener und dem Panhalm umb sichir gleyt zu schreiben ir tzu eu und erwedir von eu zu komen das wir alles von rechts wegen gethon habin und dy arme frawe sich gemueet hot ken Wien und erwedir und mit ir brocht hot der Wiener und Panhhalms poten zu vorsichern wie em umb den gepfangen und dy sachen were unde do der wiener pot in keigenwortikyt des Augustini kwam mit dem ge-richte, und ouch der Katherina do hub an der gefangener von dieser frawen zu bekennen of seyne letzte pfart das sie an der dyberay keyne scholt nicht en hette mit der tote noch mit worten wie wol er no sege das er von ir seyn leip verlisen muste und also hot er dieser frawen und irer mutter firstunt bekant vor seyner marter in der marter und noch der marter und alz er denne noch lebet dasselbe bekennet und wir eu aldo losen sitzen zu der wiener willen bis ir botschaft wedirkeret, und sint dem mole sich der armen frawen unscholt selbir meldet von dem selbschuldigem dibe der of sich selbir bekant hot wie er dortzu komen ist und wo er es hin gethon hot Bitten wir alle und eyn yden besunder diesen armen frawen mitleidiclichin irer eren beyzusteen und ir unschicht nicht zu arge zu wenden sint sich des ungelockes neymandis gehutten kan. Gebin zu Troppaw am freytage vor Cristage noch Cristi geborth Tawsend firhundert yor und in dem eyn und firtzigistem jore Cristi.

Source Fulltext: Peter Peusquens