Wir Wentzlaw von gotis gnaden hertzog und herre zu Troppaw und zu Lupschicz (Leobschütz) Bekennen offentlichen mit desem briffe vor allen dy en sehen horen und lesen dor vor unsir kegenwortikeyt und angesichte komen sint zweene briffe der hochgebornen ffursten, hertzug Wilhalms und hertzug Arnstes herren zu Troppaw, unsir lyeben brudir, und der dritte briff der Erber weysen Burgermeister und Ratmannen der Stat Troppaw, mit, Iren angehangenden Insigel In den sie offenbarlichen bekennen, von der ffrawen wegen Katherina und irer mutter zeygeryn diesis briffs von yr unschult der dyberey und vorlost etzlicher cleynat umbe dy sy mit yrer mutter Der Panhalm mitpurger zu wyen inbroch hatte und beschuldiget, durch des willen, dy selbige Katherina geschemet gelostert gemartert, und zu deme tode geteylt ist. Doch durch bathe gutir lewthe dy ir unschult, betracht haben, von deme tode ap gebethen ist, und yr Osterreych und merherlant, verpoten ist. Also das dy obengeschribene briffe lewtirlichen begriffen haben und als wir eygentlichen von gutten lewten worhaftiglichen irfaren und das irkant haben, das sy sichir-lichen der zachen unschuldig ist und dorume zo bethe wir alle und itzlichen zundirlichen der armen frawen Irer mutter und Hannschko Nympczir eren elichen manne mitleydlich zu seyn irer eren beyzustehen Reten und helffen Ap yr ymant Ir leyt und unschult forrugen adir vorweysen wolde Synt sich ungeluckis nymant vorzeyen mag Als wir auch in sulchirley mosse und eynem grossern kegen euch und den ewirn thuen wolden wenn ys sich geburen wurde, do got vor behutte. Gegeben zu Gretz am mittewoch der nesten noch der heyligen drey konig tage Anno incarnationis domini M° Quadringentesimo Quadragesimo secundo. Sigillo nostro sub appenso.

Source Fulltext: Peter Peusquens