Unsern freundlichin dinst zuvor Erbern weisen liben freunde Als ir uns yetz vorschreben habt von des Augustins wegen der etzwen Niclasen Panhalms unsers mitpurgers diner gewesen ist den eyn fraw genant Katherina bey euch in fengknus procht hab von des guts wegen das dem benanten Panhalm hie vorstolen ist wurden dorynn er se vordocht hab und hie auch dorumb gefenknust und gemartirt sey wurden und das allis von des selbin Augustins wegen geliden hab, und uns gepeten habt Ir unser Sicherheit und gleit zu geben, das sy eyn getzewgnus von uns mocht ausbrengen und ir unschult beweisen etc. das habin wir mitt merern worten ewers prifs wol vornomen und lassen euch wissen das uns der erbir weis Andre m Hiltprannt von meran unser eydgenos der dy selbe zeit Richter gewest ist und andere unser mitgesworn des Rates den die sach wol ged in gedecht-nus ist, der sach also underweist habin wie das dy vorgenant Katherina hie gefengnus ist wurden von des guts wegen das der Panhalm in seinem haws dorynn sye seyn wirten gewest ist vorloin und sye auch den egenanten Augustin seynen knecht der nu fluchtig was wurden dorynn vordacht hat nu als dy zelb Katherina bedrewet wart da bekant Sy des ersten aff eynen fromen Bognerknecht der oft zu ir in das haws gegangen was wy der das gut sold gestolen habin und sagt ym das undir seyne awgen in der gefengnus Sullit ir wissen das der selb Bognerknecht dorumb zo foste und oft wart gemartirt das es den herren dy dobey seynt gewesen het erparmt, und keyn schult mocht man an ym nicht finden, do entkegen ist dyselb Katherina auch gemartirt und ernstlich gefragt wurden, dy hot bekant das der egenante Augustin das gut Selbs dem Panhalm gestolen und durch eyn Bodem in eyn kamer gebrochen und das gut von von dannen procht hat das sey mit Irem wissen und willen gescheen, und hot dy scholt dorumb aff den Bognerknecht gelegt das der Augustin mit dem gut von dann kwem, der wer Ir liber denn der Bognerknecht, und hett Ir auch vorsprochen, Sy sult Im des vorhelffen und noch Im tzihen So wold er Sy nemen zu der ee und dorumb das Sy der dipheit dem egenanten Augustin vorholffen auch dorumb gewest und dem Bognerknecht So gar ungutlich tan hat wart Sy geurteilt zu Rechten und dornoch von dem wol-gebornen herren Graff Johannsen von Schawnberg und andern herren ap gebeten und begnadt Also das ir dy Stat vorsagt ist. Dornoch weis sich ewer Ersamkeit nu verrer wol zurichten Abir als ir uns in eym cleyn tzedeleyn habt vorkundet wy der Augustin gesprochen hab das noch hewt eyn geselle hie zu Wien sey der am meysten daran schuldig were etc. liben herren wolden wir genant wissen mit namen wer doch derselb geselle were auch noch ym stellen und dortzu thun alz sich geburt Auch so schicket der egenant Panhalm yetz seynen Boten zu ewer weisheit von seynes guts wegen Dovon Beten wir euch mit fleisse Ir wellet euch denselben Poten umb unsern willen losen bevolichin seyn und den egenanten Augustin ernstlichin fragen ap des guts icht noch vorhanden und unvortan sey das das dem selben Poten zu des egenanten Panhalms handen getzaigt und geantwurt werd das wellen wir umb euch gern vordinen. Gegeben zu Wyen am Phintztag noch sand Niclastag Anno domini etc. Quadragesimo primo Den Erbern weisen und vorsichtigen dem Burgermeister und dem Rat der Stat zu Troppaw unsern gunstigen liben frunden. Burgermeister Richter und der Rat der Stat zu Wienn -

Source Fulltext: Peter Peusquens