Erbern und weisen herren unsere gunstigen liben frunde. Unsern willigen dinst zuvor und thun ewern Erberkeiten zuwissen, das wir der Allerdurchleuchtigisten Furstin und Frawn frawn Elzbethen kunigin zu Ungern etc. zu Irer gnaden notdurft etzlich wegen mit Mell etc. zuerung hiemit schicken. So sal man uns uff denselben wegen herwider wein von Presburk zu unserr notdurft widerumb schicken und furen. Bitten wir hierumb mit allem fleisse Ir wellet durch der kunigin gnaden, und durch unserr dinst willen das vermelte Mell und auch die wein, die diese unsere wegen gen Brespurk und herwiderfuren werden, durch ewre Stat gen und varen lassen, das wellen wir alzeit umb ewre Eren und die ewern vordinen. Datum feria sexta ante dominicam Oculi Anno domini M° CCCC XLII°. Burgermeister und der Rate zu Olomuntz.

Source Fulltext: Peter Peusquens