Wir Fridreich von gots gnaden Roemischer kunig zu allentzeiten merer des Reichs Hertzog zu Oesterreich ze Steir ze Kernden und ze Krain Grave ze Tirol etc. Embieten den erbern weisen, unsern lieben getrewn..dem Burgermaister..dem Richter..dem Rat und den burgern gemaincleich ze Wienn unser gnad und alles gut. Wir lassen ew wissen, daz wir, unserm lieben getrewn, Hannsen von Eberstorf, obristen kamrer in Oesterreich, unserm Rat, und seinn erben, unser Schatzstewr ze Wienn, die Ir uns jerleich zu sand Merten tag ze geben phlichtig seit, als vil der nicht verphenndt ist und vorsteen wirt, mit ettleichen anderen unsern nutzen, und Rennten fuer ain Sum guldein, so wir In schuldig sein, nach laut des briefs, den Si darumb habent, durch unser Ret den wir, die verwesung des Lanndes Oesterreich ditzmals in unserm abwesen haben emphol-hen, versetzt habn, Emphelhen wir ew, und wellen ernstleich, wenn Ir, und unser Anwalt, in ewrm Rat, der Sum, die ew darauf verschriben und beschaiden sind, betzalt werdet, daz Ir dann mit der ubermass, die uber ewr geltschuld vorsteen wirdet, dem vorgenanten von Eberstorf, und seinn erben, vor menicleich raichet, und gebt, und ir Quittung darumb nemet, damit Si solher irer geltschuld, von den, und andern nutzen, bezalt werden, nach begreiffung irs obgemelten briefs. Wan so ir das getan habt, so sagen wir ew der egemeltn vorsteunden ubermass, der Schatzstewr ledig, und wellen ew, die, an ewerr Raittung, legen und abziehen, ungeverleich. Geben an pfintztag vor sand Johanns tag ze Sunnewenndn Anno domini etc. Quadragesimo secundo unsers Reichs im dritten jar. com(missi)o domini Regis per cons(ilium).

Source Fulltext: Peter Peusquens