Ersamen weisen besunderlieben. Als die Veint zu Anger gros scheden im lannd tuent, die der lantschaft swer ze leiden sind, wa ir die lenng zeruttung des lanndes daraus gieng, die hinfur hartt moecht widerpracht werden, und darumb auf solh vertroestung der lantschaft, So uns bei dem tag ze Krembs beschehen ist Haben wir gedacht, das solh beschedigung des lannds werd understanden und wellen darumb mit unsern aigen Personen auf sein, und yeder auf unserselbs zerung und auf den Suntag vor sant Jacobs tag nagstkuenftigen (Juli 22), veld zu Kornnewnburg machen. Davon begern wir an ew mit sunderm vleisse, das ir ew mit volk zu Rossen und zu fues-sen So ir sterkist und best, und am maisten aufbringen mueget, auch mit wegen, pukhsen und in ander wege darzu schiket und beraitt, und ew damit auf den egenanten tag zue uns in das veld fueget, und uns in den sachen beigestendig seit, damit das lannd in frid gesatzt werde und be-stellet ob des not beschech, das dann yederman auf sey, und in das veld ziehe, und getrawn ew wol, das Ir ew darinn nichts lasset Irrn. Als ir des unserm egenanten gnedigisten herrn dem Roemi-schen kuenig, kuenig Lasslawen dem land, und ewselbs schuldig seit wan geschech des nicht So wurd man gedenken, Ir woltet gemainen nutz des lannds nicht gehorsam sein, des wir doch zu ew nicht hoffen. Sunder begern wir an ew, das ir das offenleich lasset berueffen, das wirdet derselb unser genedigister herr der kunig gnedichleich gen ew erkennen und wir wellen das gern umb ew verdienn. Geben an Eritag nach sant Johanns tag ze Sunnbenden Anno domini etc. xl secundo. Unsers gnedigistem herren .. des Romischen kunigs etc. Ret und verweser des lannds Osterreich.

Source Fulltext: Peter Peusquens