Ersamen weysen sunderliben herren . frunt und liephaber Nach meinem hochsten vermugen, mich selbs in steten diensten, alltzeyt bevor. Ewer weyßheyt thuen wir claglich und mit pitterem hertzen ze wissen, wie uns unser Allergnedigisten frawen und hochgepornen kuniginn frawen Elizabeth seliger und hochgelobter gedachtnuss vorscheyden Grassen Smertzen, ubergrasses laeid und swendiges betrubtnuss zuezeucht, so ir gnade so gar gaehling entzwischen disen Taidingen des frides und villeicht von solichen mittleren und frid taidingeren disen tad hat emphangen etc. Nu sein wir mit den Erbaren steten allen dy an Ir gnaden teil seind eintrachtig darauff pliben, das wir (nach) nymantz lebendigem, den Ir gnaden Suon dem Allerdurchleuchtigisten fuersten und hoch-wirdigen herren kunig Laslaen unserem natuerlichen herren mit alsferr und uns leib und gueth wendet wellen getrewlich und an alles wenken peysten. Auch so hab wir nach des herren legaten gepot und pethe disen anfank des frides unvorruckt untz her gehalden, ader uns und unsern untergebenn Lewten und Steten, von des von Polan seytten in der zeyt grasse schaden und einfell seind zugetzogen warden, das wir also, dem vorgemelten herren legaten in unserer vor-brifung schrifftlich oft haben vorgebracht und ertzelet, ader nye kain anwart hab wir von Im mugen gehaben und dasselbe thuen wir euch sunderlich zewissen Bittunde Inniclich ewer Ersame weyshait uns darynn Rathulffig ze sein was uns darynn ze thuen ist. Auch sunderlich beger wir uns zu vorkunden alle gelegenhait der taiding des frides und wye enneben Ir euch wellet halden, und so es zu sachen qwem, ob wir uns wustenn mit hulff und ratsuchung zu euch vorsehen ader nicht wann wir je ain gantz vertrawen haben zu euch Dannach so gerucht uns alles sachen schriftlich unterweysen, Auch pitten wir ewer Ersame weysheyt, Gerucht zu gedenken vor herren Frumstein als Im dann der herr pischolff von freysing mitsampt den andern herren phlichtig seind als andren gueten lewten von kunig Albrecht wegen zalen und ausrichten. Datum. Auch pitten wir uns kund zethuen wo mein gnadiger herr der (kunig) Roemische kunig sey und so des gewar wert (sendet Im disen priff zu lesen, wenn ich: gestr.) thut sein gnaden wissen das wir nie zu nymantz dann zu seinen gnaden zu sehen haben, Ob sein gnad sich zu uns halden wil ader was sein gnaden willen ist und thut uns das In gehaim zu wissen, Es geet uns sust wol Datum Krempnicie infra octavas Epiphaniarum domini festivitatis, anno domini etc. xliij°. Johan Giskra von Brandiss, Graff zu Sarossh etc. des hochgeboren kunig Laslaen Obrister hauptman

Source Fulltext: Peter Peusquens