Unsern willigen unverdrossen dinst zuvor, Ersamen weizen besunder gonner und furderer Als denn itzunder leyder offembar ist, das unserr gnedige frawe kunigynne von gotis verhenknisse vorscheiden ist, der got der Allemechtige gnedig sey, das wir zumole hoch und sere erschrocken seyn, davon uns notdurfft were zu wissen in welchir weize und crankheit Ire gnade verscheiden ist, und auch ap die Stete und Slos zu Hungern, die uff Irer seyte sein gewest uff unsern gnedigen herren kunig Laslawen bestendig stehen wellen adir nicht Adir ap sie sich von Im an den kunig von Polan geworffen hetten, und sunderlich ap unserr gnediger herre der Romische kunig, den ge-nanten kunig Laslawen unsern herren in schuezunge und schirmunge uffnemen, und bey seiner gerechtikeit seynen landen und luten behalden welde. Dovon bitten wir ewir Ersamkeit zumole dinstlichen mit fleisse, was Ir in diesen sachen wisset adir vernemet, das Ir uns das in heymlich-keit bey diesem boten vorschreiben und zuwissen tun wellit, das wir uns allhie in sulchen not-durftigen sachen, dornoch mogen wissen zurichten und zuschicken, das wellen wir umb ewir Ersamkeit alletzeit fleissiglichen gerne vordinen, und bitten des ewer gutige verschreben antwurt. Geben am Mittewochen nach Epiphanie domini Anno etc. XLIII°. Ratmanne der Stat Breslow

Source Fulltext: Peter Peusquens