Ersamen und weissen liben hern und gutige gunner. Unseren fruntlichen gruß und willige stete dinste czw allertzeit bereit ewer ersamkait meyn gepit Wir thun euch czw wissen das wir uns haben vorbunden mit dem bischoff von gran und mit den andern hern dy do der gerechtikeit und unsern naturlichen hern konig Laslan beisteen und helffen und uns der bischoff seyne eigene gesloss off geben wil das wir das dn bas beschirmen mogen unsern hern seyn lant und uns dy stete gemeiniclich gesworn haben irn naturlichen hern czw helffen bas an ir ende mit alle irm vermogen also in dertzeit unser gnedigen frawen der got genod Dorumb bitte wir ewer aller ersamkeit das ir uns losset wissen wo unser gnediger herre, herre Friderich, von gotis genoden Romischer konig ist, das ir uns lot wissen auff das schirste wen wir noch gote czw nymanden czuflocht haben wen czw seyner genoden und unser sachen dnclagen, und wir euch auch clagen obir den polnischen konig, wy das her nicht halden wil den fride und dy eynung dy sy gemacht haben mit unser genedigen frawe der got genod und unsern naturlichen hern seyn lant alletag tegelich vorsriben Dorumb bitte wir ewer ersamkeit das ir uns en guten Rot helffet Roten obir dy obgenanten zachen wen sy uns keynen fride halden wellen Noch der beslißung keynes meynen czw halden Dorumb bitte wir euch das ir uns auch list wissen dy meynung unsers genedigen hern konig Friderich ab ir icht vernomen het ab her uns auch holffe thuen wil adir nicht wen wir Czw Nymand anders hoffnung haben wen Czw zeyn genod wen seyn genod unsern naturlichen hern hot czw seyner gewalt, und wir getrewen euch auch also unsern liben hern das ir uns nicht lassen wat ir wert uns helffen und beisteen wenis not geschit des selbigen gleich wir auch. Datum auff der Kremnitz an sente Pauls tag, anno domini millesimo cccc° xliij. Ich Giskra von Brandis Groff Czwm Sarusch etc. haupman koenig Ladislai koenig Czw Ungarn etc.

Source Fulltext: Peter Peusquens