Fridrich von gotes gnaden Romischer kunig zu allen zeiten Merer des Richs Hertzog zu Osterrich etc. Getrewen lieben. Uns ist Botschafft komen aus Behem, wie die Behemischen herren, Ritterschafft und Stete, von der gantzen Cron wegen, desgeleich auch aus Slesien und Merhern, mit ainer merklichen anzal leute, uff sand Michels tag schirst, zu uns gen Wyenn koemen suellen. Also ist unser ernste maynung, daz Ir aigentlich bestellet, daz Sy herberg haben, und daz man die herberg mit petten, stallung, und andern notdurfften, zuorichte, und auch also anslahe, daz die Geste, mit dem hauszynnse, nit besweret werden, als dann nechst geschehen ist, da Sy bey uns zu Wyenn warn. Desgeleich daz auch die Speise, und der markt, uff ain zymlichs, gesatzt werde, wan man sich nach dem newen, nu dar nach wol mag gerichten. Sunderlich bestellet auch so Sy komen, daz man uff den Brukgen von In nichts neme, darumb auch nechst rede was, und tuot in den sachen gantzen fleiss, daz wir ew darumb nit schreiben beduerffen, wan wir uns des uff ew verlassen. Und versehet uns und ew darInne, wan wir das nechst, den Behemen zubestellen zuo-gesagt haben. Daran tuot Ir unser maynung und gevallen. Geben zur Newnstat an suntag nach sand Laurencien tag. Anno domini etc. XLIII°, unsers Richs im virden Jare. de mandato domini Regis.

Source Fulltext: Peter Peusquens