Ich Weychart bei den Bruedern ze Wiennen vergich und tuen chunt allen den die disen brief lesent oder horent lesen, daz ich oder mein Erben, Hainreichen dem Swechenter oder seinen erben, die vierdhalb phunt Geltes und fumf und zwaintzich phennige geltes. und aecht huener geltes. datz Luentz wider ze chauffen sullen geben von sand Michels tag der nu schierist chumpt uber ain jar und ze dehainer zeit furbaz mer umb viertzich phunt alter wienner phennigen daz er und ayner seiner genazzen mit iren trewen gesprechen muegen daz si sein aygenhaft guet sein an allez geverde. Und des ze urchunde . so gib ich in disen brief versigelt mit meinem Insigel. und mit Jansen insigel . des Mukkarawer. der diser sache geczeug ist mit seinem Insigel. Der brief ist geben ze Wiennen . do man zalt von Christes gepuert . dreutzehen hundert jar dar nach in dem fumf und viertzigisten iar . des Phintztages an sand Michels Tage.

Source Fulltext: Peter Peusquens