Fridreich von gotes gnaden Roemischer Kunig zu allenzeiten Merer des Reichs Hertzog ze Oesterreich und ze Steir etc. Erbern weisen und lieben getrewn. Als wir die lanntschafft gen Wienn gevordert haben auf sannd Niclas tag nachstvergangen durch befridung willen des lanndes bey demselben tag aus aim verschriben lanntsfrid geredt und in noteln komen ist und wer ze hoffen gewesen, solten meniger lanntleutt niderhalb und ob der Enns auch sein zu dem tag komen, der benant lanndsfrid wer da zu ennd beslossen worden, Solh besliessung sich aber durch Irs abwesen willen verzogen hat, Dadurch wir uns nach Rat und begerung der die dazemal ze Wienn gewesen sind, ainen andern tag furgenomen haben, und emphelhen ew ernstlich und wellen, daz Ir dadurch acht aus ew mit voelligem gewalt, auf den Suntag Reminiscere in der vasten schirstkuenfftigen ze Wienn bey der lanntschafft habt, und ewr Stat Insigel mit bringen lasst, desgleichen wir der andern lanntschaft yetz auch schreiben, damit den sachen verrer nach-gangen, und der lanntsfrid ganntz beslossen werd, das wellen wir gnedicleich gen ew erkennen. Geben an aller Kindlein tag, Anno domini etc. XLIIII°(sic!), unsers Reichs im virden jare. Commissio domini Regis per consilium.

Source Fulltext: Peter Peusquens; siehe auch: Kollar, Analecta 2, 1150 n° 89