Unsern frundlichen dinst zuvor, Ersamen weizen lieben frunde, Wir tun euch wissen das der Edler herr Niclas Troxes uff Stetz gesessen, unsern miteburgern Irer habe und gut nehiste uffgehalden hat, in solchir meynunge, das das Bronner gut werer gewest Nu haben wir seiner Edilkeit und andern herren nehiste dorinne geschreben, das die unsern zu den heiligen behalden haben als Recht ist, das dasselbe gut Ir ist und nymands anders, doruff der genante herr Niclas Troxes etlich gut eyns teils uff Burgen hat usgeben, dovor der wolgeboren herre herr Cristoff von Lichtensteyn globt und Burge ist wurden, und eyns teyls des gutis, hat der genante herr Niclas Troxes ent-halden und nicht wedergeben, Bitten wir euch dinstlichen mit fleisse, Ir wellit mit dem genanten herrn Niclasen Troxes bestellen und mit gutiger anhaldunge In underweisen, das her den unsern Irer habe und gut gantz und gar welle wedergeben, adir eyn genugen mit gelde dorinne tun, und das, bedencken, das wir eynen herren haben und zusampne gehoren, und auch besundern, das der wolgeboren herr Cristoff obgenant, sulchir globde von der unsrer wegen, qweit und ledig moge werden, wenn wir yo von dem genanten hern Niclasen Troxes nichts anders wissen wenn gutliche gescheffte und allis gut, und die sache zum besten wende, das wellen wir umb euch gerne vordienen, und des bitten wir ewir vorschreben antwort. Geben Am Sonnabend vor Invocavit Anno domini etc. XLIIIIto. Ratmanne der Stat Breslow

Source Fulltext: Peter Peusquens