Wir Richter und Rate der Stat zu Prespurg Bechennen offennleich mit dem brief, Das fur uns ist kommen in unsern Rate Die ersame fraw Lucia Hannsen dez Brunner mitburgers zu Wyenn rechte tochter und nu Jorigen dez Meindlein unsers mitburger eleiche hausfraw Dieselb fraw Lucia hat vor uns mit guetem willen bedechtleich und unbetwungen, Dem benantem irm vater Hannsenn Brunner, Den Satz der zwayer hundert phund phening wyenner swartzer munss so sy gehabt auf dem haws Irs benanten vater hat. Gelegen in der wollzeil der bedachten Stat ze wienn zenachst Ulreich dez Pfanzagel hawsung Ganntz quidt frey ledig und los gesagt, und uns gepeten dem obgenanten irm vater Hanns Brunner, des unser offenbare chuntschaft zegeben, Dy wir im nach solichem begern dann geben in kraft des briefs, ze urkunde mit unserm der Stat zu Prespurgk aufgedrukten Statsigel besigelt Doch uns unsern nachchommen und der Stat an schadenn. Geben zu Prespurkch an pfinztag vor dem Palm Ostertag Anno domini millesimo etc. quadragesimo quarto.

Source Fulltext: Peter Peusquens