Erber und weis Unser willig dinst wisset bevor Wir lassen ewr weishait wissen, daz fuer uns komen sind fuer offen Rat, Hanns pogner und Hanns schuester baid unser Mitburger In der Eysneinstat und ir baider Hawsfrawn, und habendt uns gepeten ewrer weishait zu zeschreiben Wie und Sew Nachst frondt sein Peter des Maroldts saeligen Tue wir ewrer weishait ze wissen das uns kund und wissenleich ist, das dew gegenburtigen fraw Angnes Hansen des pogner hawsfraw und fraw Margreth Hansen des schuester hawsfraw mit Peter des Maroldts saeligen Rechte leipleiche geswistret kinder gebesen sind Wann der Hanns pognerin vater saeliger und Peter Maroldts mueter und der Hanns schuesterin mueter drew Rechte leipleiche geswistret gebesen sind von vater und von mueter Bitt wir ewr weishait In sunderm wolvertrawn ir wellet ew dew selbig frontschaft durch got und durch des Rechtens willen lassen bevolhen sein wes und sew dann Recht habent das well wir altzeit umb ewr weishait verdienn In ainem soleichen oder merern. Geben in der Eysneinstat an Phintztag vor Judica Anno etc. Quadragesimo Quarto Burgermaister .. Richter und der Rat in der Eisneinstat

Source Fulltext: Peter Peusquens