Ich Wilhalm bey dem Prunnen Purger ze Wienne. Vergich und tuon chunt allen den die disen brief lesent oder hoerent lesen. die nu lebent und hernach chuenftich sint Daz ich mit willen und gunst meiner hausvrowen vron Annen. und aller meiner Erben mit verdachtem muot und mit guoten sinnen zue der zeit do ich es wol getuen mochte. Recht und redleichen Geschaft han mein Geschaefte als ich es will daz es nach meinem Tode staet und unzerbrochen beleibe als hernach geschriben stet. Des ersten so han ich Geschafte meiner Swester Katrein datz sant Jacob ze wienne Sechtzehen phunt wienner phenninge. da man ir zway phunt geltes umb Chauffen sol. die si haben sol ze pezrunge irr phruent und irs gewantes unverchummert untz an irn tode und nach irm tode So suln si denne beim Chloster sant Jacob beleiben. daz man ir und mir und unsern vodern in demselben Chloster ewichleichen alle iar einen Jartage da von begen sol mit vigili mit Selmesse und mit anderm gepet als irs Ordens gewonhait ist. Dar nach so han ich Geschafte meiner Muomen Swester Christein der Wilhalminne in dem selben Chloster fuemf phunt. und Swester Gedrauten der Jacobinne zway phunt. und Prueder Petrein ze Liligenvelde zway phunt. und hintz den Predigern zu dem Pawe zehen phunt. hintz unser vrowen auf der Stetten zuo dem Pawê Sechs phunt. Und Lambern und Casparn meins Oehaims Suenen wilhalms in dem Strohof dem got genade zwaintzich phunt. und achhatzio Irm Prueder datz sant Poelten und irn zwain Swestern datz sant Jacob ze wienn zwelif phunt. und meinem Oehaim Uolrichen dem Mergeb zway phunt. und der alten Pokchschedlinne fuemf phunt. und irr Snuer vier phunt. und meinem Schuelmaister zway phunt. und Aelblein dem Wagenchnecht ayn phunt. und meinem Choch ain halb phunt, und Pernolten ain phunt. Und meinem Peichtiger hern Symon Chormaister datz sant Stephan ze wienne ayn phunt und Prueder Uolreichen datz den Predigern zway phunt. Und der alten Gedrauten dreu phunt. und meinem Chapplan dreu phunt. Und wisenten meinem Diener ain phunt. Und meinem Diener dem vridhauner vier phunt alles wienner phenninge. Dar nach so han ich Geschaft meinem Pruder. Prueder Nichlasen werschrat ze Liligenvelde. Vier phunt wienner phenninge geltes. die im mein hausvrowe und meineu Chinde alle iar dienen und raihen suln von meinem Newen haus auf der Stetten oder swer daz selbe haus nach in besitzet untz an seinen tode ze Pezrunge seiner Phruent und seins gewantes. und nach seinem tode so suln denne die selben vier phunt geltes meinen naehsten Erben ledich sein. und auf si gevallen an allen chriege. Dar nach So han ich Geschafte. den gaistleichen Herren dem Convent gemain ze Liligenvelde dreu phunt wienner phenninge geltes Purchrechts die da ligent auf des Zoetleins haus des Sneyder daz da leit auf den Lauben ze wienne daz weiln des vreuntsperger gewesen ist. Ich wil und beger auch ob got ueber mich gepeut. daz man meinen Leichnam denne bestaten sol in dem Chloster ze Liligenvelde vor sant Bartholomes alter. und schaffe auch daz man denne mit der Leich fuere mein Pestes Ros und meinen harnasch und zway Guldein Tuech. und einen halben zenten wachs. daz man alles in demselben Chloster sol lazzen. Dar nach so han ich geschaft daz man geben sol hintz sant Stephan zu wienne ain Guldein Tuech. Dar nach so han ich Geschaft daz man umb zehen phunt wienner phenninge Chauffen sol Leineins Tuech. und daz sol man denne Tailn und geben under die Duerftigen in der Purger Spital ze wienne als verre es geraihen mage. Dar nach so han ich geschafte daz man den Duerftigen gemain ueber alle in dem selben Spital dar zue geben sol ein guet Mal und ein Pade. und Newes Petstro in ir iegleichs Pette. Dar nach so han ich Geschafte meinem vetern Otten bey dem Prunnen ainen weingarten der da leit in dem vohental des ein halbs Jeuch ist mit wein mit alle. Dar nach so han ich geschafte Chuenigunden meiner Muemen meins vetern Tochter Jacobs bei dem Prunnen dem got genade. zwaintzich phunt wienner phenninge. Zue den Dreizzich phunden die ich ir gelten sol. da mit man si bestatten sol nach unser vreunt rat. Dar nach so han ich geschafte daz man Chauffen sol zway phunt wienner phenninge geltes Purchrechtes hintz den Predigern ze wienne meinem vater und meiner Mueter zue einem ewigen iartage den man in in dem selben Chloster alle iar da von begen sol an unsers Herren Gotes Leichnam abent. Dar nach So han ich Geschafte daz man Chauffe Dreu phunt wienner phenninge geltes der Pharrchirichen ze Intzestorf also daz der Pharrer da selbens ewichleichen alle wochen zwo Messe da von haben sol ze willendorf in meiner Chappellen. Dar nach so han ich Geschafte meiner Swester Chinden weiln Merten hausvrowe hern Hermans Sun an dem Chienmarchte Torathen und Annen mein zwen Paumgarten ze alt tunawê und daz haus dabei. Dar nach so han ich geschafte meinem Oehaim Jansen in dem Strohof meinen weingarten der da leit an dem Obern Alssekke des ein halbs Jeuch ist. Darnach so han ich Geschafte meinem Prueder Hainreichen drithalb phunt wienner phenninge geltes. die da ligent auf des Meller haus des Muenzzer bei der Pognerstrazze. Dar nach so han ich Geschafte meiner Tochter Annen meinen Weingarten der da leit ze Otachrinne des zway Jeuch sint. und meinen weingarten der da leit an dem Sunnperge zwischen Grintzingen und Toeblich des andert halb Jeuch sint daz man si da mit bestatten sol mit verheyraeten nach der Stat recht ze wienne. Und nach freunt rat. und swenne auch daz ist. daz mein hausvrowe vrowe Anne nicht mer enist. So sol denne mein Tochter Anne die selben zwen weingarten werffen in Geleichen tail. und sol auch si denne geleichen Erbtail nemen von allem meinem guot daz ich hinder mir lazze mit irm Pruder Herman meinem Sun. Dar nach so han ich Geschafte meiner Swester Elzbeten Jansen hausvrowe des Stainpekchen mein Muel datz Portz. und meinem Oehaim Reynprechten viertzich Tagwerich wismades und mein holtz daz alles gelegen ist an dem Gluthauen. Dar nach so han ich geschaft meinem Oehaim Walthern zway fuder weins aus meinem weingarten ze Otachrinne. und dem egenanten meinem Geswein Merten meinen Swartzen vollen. Dar nach so han ich Geschafte ein halb phunt wienner phenninge geltes Purchrechts in unsers Herren Gotes Leychnam zeche daz da leit auf einem Prottisch an dem Hohenmarchte gegen dem Vischhof ueber. Ich schaffe auch daz man gelt allen meinen geltern den ich gelten sol. daz ein gewizzen ist. Ich schaffe auch daz man daz vorgenant mein Geschaefe alles. volfuere von allem meinem varundem guet daz ich hinder mir lazze Swie so daz genant ist. Waer aber daz man daz selbe mein Geschaefte alles daz ich geschafte han als vor verschriben ist. von meinem varundem guet nicht gar verrichten moeht. So sol man es denne gantz und gar verrichten und volfuern von meinem Erbguet daz ich hinder mir lazze. Und swaz denne des andern guetes ist daz ich hinder mir lazze es sei aigen Purchrecht Perchrecht Haeuser weingarten Guelt swie so das genant ist oder swo so daz gelegen ist. daz ich und mein hausvrowe vrowe Anne zue ein ander pracht haben. oder daz uns an erstorben und gevallen ist von vater und von Mueter die weil wir baideu bei ein ander gewesen sein oder daz ich bei ir gechauft han. oder daz mir mein Pruder Prueder Nichlas wetschrat gemacht und geben hat. daz schaffe ich alles. daz daz mein hausvrowe vrowe Anne in nutz und in gewer sol haben unverchummert und unverraites untz an Irn tode. ob si wittibe beleibet. und sol auch si denne unser baider Chinde damit ziehen und inne haben nach irn trewen. Waer aber daz mein hausvrowe vrowe Anne einen andern wirt naem. so soll si denne nicht anders haben. denne vier hundert phunt ir Morgengabe untz an irn tode unverchummert. und sol man ir dar zue geben von anderm meinem guet Zway Hundert phunt wienner phenninge. die si ledichleichen haben sol. und geben swem si welle an alle irrunge. Und suln sich denne die erbern Leut mein freunt hern Weichart und her Uolreich bei den Minnern Pruedern Mert mein Geswey. Jans in dem Strohof. Reymprecht bei dem Prunnen meiner Chinde. und des andern meins guetes alles under winden den ich alles mein geschaefte hintz irn trewen enpholhen han also daz die selben fuemf zwen aus in. oder aus andern meinen freunden nemen und wellen suln. dem si meineu Chinde mit sampt allem irm guet denne enphelhen suln. die in alle iar wider raiten und daz uebrige meinen Chinden ze Pezrunge an legen. Waer aber daz mein hausvrowe vrowe Anne wittiben weis sturbe êe daz meineu Chinde beheyraet wurden. So suln sich denne aber die egenanten fuemf den ich mein Geschaefte enpholhen han meiner Chinde und alles irs guetes under winden in dem rechten als vor verschriben ist. und suln si da mit ziehen und bestatten. So si peste muegen und auch nach ander meiner freunt rat. Und daz ditzs Geschaefte nach meinem tode also staet und unzerbrochen beleibe. Dar ueber so gib ich disen brief zuo einem offen urchuende. und zuo einem warn gezeuge diser sache versigilt mit meinem Insigil. und mit hern Otten Insigil von Chueleub zu den zeiten hofmeister des hochgeborn fuersten Hertzoge Albrechts ze Oesterreich ze Steyr und ze Chernden. und mit der egenannten zwayer Prueder Insigiln hern Weychartes und hern Uolreichs bei den Minnern Pruedern. und mit hern Reymprechts Insigil des Zaunrueden zu den zeiten Purgermaister ze wienne. und mit hern Dietreichs Insigil des urwaetschen. und mit Merten Insigil meins Geswein. und mit meiner Oeheim Insigiln Jansen in dem Strohof. Reymprechts bei dem Prunnen. und mit meins Swagers Insigil Mathes hern Hermans Sun von sant Poelten. dem got genade. die alle ditzs Geschaeftes gezeuge sint mit irn Insigiln. Dieser brief ist geben ze wienne nach Christes gepurt dreutzehen hundert iar dar nach in dem Syben und viertzgisten iar an sant Peter und sant Pauls Tage.

Source Fulltext: Peter Peusquens; siehe auch: Schlager, Wiener Skizzen 2, S. 292 - 299, Beilage no 5.