Wir Albrecht von gots gnaden . Hertzog ze Österreich, ze Steyr, und ze Kernden . Enb(ieten) unsern getrewen .. dem Richter, und den purgern gemainleich, auf der Zeyrik, unser gnad, und alles guet. Wir haben geschaft, mit unsern pürgern ze Wienn. daz, si, von unser wegen und von iren wegen, einen phleger auf die Zeyrik setzen, der da huett, und bewar, daz niemant auz, oder in, uber die Zeyrikke, var, denn die fumf stett, von Ens, von Lintz, von der Freynstat, von Wels und von Gmunden, alz ez von alter herchomen ist, und daz auch die, an geverd, und an alle arge list, nuer ir aygen guet fueren, und niemant mit in, durch helffen. Wurd daruber yemand, an dehainen sachen begriffen anders denn vor geschriben ist, desselben hab . sol sich derselb phleger, underwinden zu unsern handen, und sult ir im, dartzu ernstleich beholffen sein, daz gebieten wir ew bei unser hulden. Geben zu Wienn, an Eritag nach dem Sunntag, so man singet Cantate. Anno . domini . Millesimo . Trecentesimo Quinquagesimo primo.

Source Fulltext: Peter Peusquens