Ich Symon Lewtolts aydem dez Wolfs von Radawn . purger ze Wienne . und ich Margret sein hausvrowe . Wir veriehen und tuen chuent allen den die disen brif lesent oder horent lesen . die nue lebent und hernach chuenftich sint . daz wir mit unser Erben guetem willen und gunst mit verdachtem muet und mit Gesampter hant zue der zeit do wir ez wol getuen mochten . Und mit unsers pergmaisters hant hern Gerungs dez Choln . zue den zeiten amptman dez chlosters ze Newnburch . Recht und redleich verchaufft und geben haben unser viertayl weingarten . gelegen ze Grintzing in dem Alten Phenning . ze naechst Chuenraden dem Tuechler . do man auch alle iar von dient dem chloster ze Newnburch . drithalb viertayl weins ze perchrecht , und drew ort ze voytrecht und hern Lucasen dem Hansgrafen . dem Popphinger siben emmer weins ze Ueberzins und nicht mer . Mit alle den nuetzen und rechten alz wir daz selb viertayl weingarten unver-sprochenleich in perchrechts gewer her pracht haben . Umb acht und zwaintzich Emmer weins der wir gar und gaentzleich verricht und gewert sein . Dem beschaiden mann Ulreichen dem Schoenobinallen . ze Grintzing und seiner hausvrowen vrowen Elzbeten und irn Erben . fuerbaz ledichleichen und freyleichen ze haben und allen irn frumen do mit ze schaffen verchauffen versetzen und geben swem si wellent an allen irrsal . Und sein auch wir und unser Erben unver-schaidenleich . dez selben viertayls weingarten . Ir recht gewern und scherm fuer alle ansprach alz purchrechts recht ist und dez Landez recht ze Oesterreich. Get in fuerbaz mit recht dar an icht ab . daz suln si haben auf uns unverschaidenleich und auf allem unserm guet daz wir haben in dem Land ze Oesterreich wir sein lebentig oder tod . Und daz diser chauf fuerbaz also staet und unzerbrochen beleib . und wand wir selber nicht aygens Insigils enhaben . dar umb so geben wir in disen brif zue einem warn urchunt diser sach versigiltn . mit dez perchmaisters Insigil dez vorgenanten hern Gerungs dez Choln . und mit hern Seyfrits Insigil zue den zeiten gesezzen an dez Hertzogen stat in der Slachstuben ze Wienne. die wir dez gebeten haben daz si diser sach gezewg sint mit irn Insigiln . Diser brif ist geben ze Wienne nach christes geburt drewtzehen hundert iar dar nach in dem zway und fuemftzigisten iar . an sant Margreten Tag.

Source Fulltext: Peter Peusquens