Ich Pylgreim dez Roten Hern Pylgreims sun . dem got genad . und ich Anne sein hawsvrowe . Wir veriehen und Tuen chunt allen den die disen brief . lesent oder hoerent lesen . daz wir mit unser Erben guetem willen und gunst . mit verdachtem muet . und mit gesampter hant . zue der zeit do wir ez wol getuen mochten . Und mit Lewpolts hant . zue den zeiten schaffer und phleger . der duerftigen guet in der purger Spital ze Wienne . Recht und redleichen verchauft und geben haben. fuemf phunt wienner phenning gelts purchrechts . auf unsern Zwain Tailn . dez Hawses gelegen in der undern pekchenstrazze ze Wienne . und get hinden durchlangs aus . in die hindern pekchenstrazze . daz weiln dez vorgenanten meins vater hern Pylgreims gewesen . ze naechst an dez Mawerleins haus . da man auch von dem egenanten haus gantzem dez drei Tail sint . alle iar dient . den duerftigen in der purger spital . sechs wienner phenninge ze Gruntrecht . und nicht mer . der uns vier phenninge an gehoeret von unsern zwain tailn . und den dritten tail zwen phenningen . umb fuemftzich phunt wienner pheningen . der wir gar und gaentzleich verricht und gewert sein . Unserm swager hern Seyfriden zue den zeiten gesezzen an dez Hertzogen stat . in der slagstuben ze Wienne. und seiner hawsvrowen vron Margreten und iren erben fuerbaz ledichleichen und freileichen ze haben . und allen iren frumen da mit ze schaffen verchauffen versetzen und geben swem si wellen an allen irresal . also beschaidenlich . daz wir . oder swer unser zwen tail dez obgenanten hawses . da engegen si auch den dritten tail habent . nach uns besitzet . in die egenanten fuemf phunt gelts purchrechts . fuerbaz alle iar . da von dienen sueln . zue drin zeiten im iar . an sant Michels tag ze weihennachten und an sant Joerigen tag . zue ainen iegleichen dienst tag dreitzehen schilling und zehen phenningen . mit alle dem nutz und recht . alz man ander purchrecht in der stat ze Wienne dient . Und sueln auch wir die selben fuemf phunt gelts purchrechts abloesen . swenne wir muegen oder wellen . mit ein ander . mit fuemftzich phunt wienner phenningen . Und sein auch wir . und unser Erben unverschaidenlich . der selben fuemf phunt gelts . auf unsern zwain tailn dez obgenanten hawses . ir recht gewern und scherm fuer alle ansprach . alz purchrechtes recht ist . und der stat recht ze Wienne. Get in fuerbaz mit recht dar an icht ab - daz sueln si haben auf uns . unverschaidenlich und awf allem unserm guet daz wir haben in dem land ze Oesterreich . wir sein lebentich oder tode . Und daz zue urchuent so geben wir in disen brief . versigilt mit unserm Insigil . Und mit dez vorgenanten Lewpolts . der purger spital schaffer Insigil. und mit hern Hainreichs Insigil dez Oeler . und mit Lucas Insigil dez Popphinger zue den zeiten Hansgraf ze Wienne mein vorgenanten Annen prueder . die diser sach gezewge sint . mit iren Insigiln . Diser brief ist geben ze Wienne . nach Christes Gepuerde drewtzehen hundert iar . dar nach in dem zwai und fuemftzigisten iar . an sant Jacobs abent.

Source Fulltext: Peter Peusquens