Ich Hainreich der Wuerffel. und mein Erben Veriehen offenlich an disem brief . umb die zwelif schillinge wienner phenninge gelts purchrechts . die wir gehabt haben . auf dem weingarten gelegen ze Engelschalchstorf . der weiln gewesen ist Dietreichs dez pergmaister der Schafferinne sun . der von dem Hertzogen perchrecht ist . und den man verdient auf daz haus ze Medlich . und auf dem hof gelegen da selbs ze Engelschalchstorf . der auch dez vorgenanten Dietreichs dez pergmaister gewesen ist . und straz dar zue gehoert . da man auch von dem selben hof alle jar dient . meinem Oheim Haunolden dem Schuehler achtzich wienner phenninge . an sant Michels tag . und drew huener ze weihennachten . und dreyzzich ayer . und drey chaes ze ostern ze rechtem dienst und nicht mer . die wir auch gechauft haben . wider Herman dem Chrannest . daz chaufguet . die selb gult . auch gewesen ist alz die zwen brief . unser chaufbrief . und sein chaufbrief sagent . die er uns . in unser gewalt geben het . und die wir verloren haben . Daz wir die selben zwelif schilling gelts ab dem vorgenanten weingarten ab dem hof . und swaz dar zue gehoert . ze ledigen und ze losen gegeben haben dem erbern manne Jansen dem Paechlein . und seiner hausvrowen vron Engeln und irn erben . umb sechtzehen phunt wienner phenninge . der sie uns gar gewert habent . also daz wir . auf den weingarten und auf den hof . und swaz dar zue gehoert . hintz in . noch hintz den die es inne habent und besitzent . umb die vorgenanten zwelif schilling gelts . suln fuerbaz nimmermer mit chainerly sachen . chain ansprach noch vodrung gehaben noch gewinnen weder umb vil . noch umb wenig Und waer auch . daz die zwen chauf-brief . die wir verloren haben . fuerbaz funden fuer getragen oder gezaigt wurden von uns oder von wem daz waer . die suln denne tod und ze nicht sein . und chain chraft nicht mer haben . weder umb vil noch umb wenig . Und dez zue urchuent . so gib ich in disen brief versigilt mit meinem Insigil . und mit des vorgenanten Haunolts Insigil dez Schuehler und mit meins suns Insigil Nichlas dez Wuerffels . und mit dez vorgenanten Hermans Insigil dez Chrannests . die diser sach zeugen sint mit irn Insigiln. Diser brief ist geben nach christes gebuerd dreutzehen hundert iar . dar nach in dem zwai und fuemftzigisten iar . an sant Michels abent.

Source Fulltext: Peter Peusquens